पाँचमा कति स्टार दिनुहुन्छ ?

‘पाँच नै’

निर्माण पक्षलाई के भन्नु हुन्छ ?

‘तेस्रो सिक्वेल चाहियो’

फिल्म कस्तो छ ?

‘बबाल’

द सिनेमा टाइम्स, काठमाडौं – अहिले देशभरका सिनेमा हल पुग्दा अधिकांश दर्शकले भन्ने यही नै हो । र सिनेमा हो ‘पशुपति प्रसाद २ : भष्मे डन’ । ‘पशुपति प्रसाद २ : भष्मे डन’लाई दर्शकको उल्लेख्य साथ मिलेको छ । दर्शकले तारिफ गरिरहेका छन् । यसको अर्को सिक्केलको माग गरिरहेका छन् । त्यसो त ‘जारी’ पछि हलमा दर्शक तान्ने सिनेमा पनि यही नै हो । यो बीचमा रिलिज भएका सिनेमाले यो तहमा दर्शकको साथ र प्रतिक्रिया पाइरहेका थिएनन् ।

हलमा दर्शक फर्काउने र हलबाट बाहिरिँदै गर्दा तेस्रो सिक्वेल पनि चाहियो भन्ने सिनेमा ‘पशुपति प्रसाद २ः भष्मे डन’ कथा के हो ?

‘पशुपति प्रसाद २ : भष्मे डन’ आम भुईँमान्छेको सपना हो । घर गाउँमा जिन्दगी चलाउन नसकेपछि रंगीन सपनाको भारी बोकेर जिम्मेवारीको ठूलो बोझ बोकेर काठमाडौं उपत्यका छिर्ने आम भुईंमान्छेको कथा हो । सोच्दा र देख्दा जति राम्रो छ काठमाडौं वास्तवमा भोग्दा त्यस्तै छ अथवा छैन ?

रंगीन देखिने मान्छेहरु वास्तवमा कति कुरुप छन् ? सुन्दर आवरणमा छोपिएका कुरुप मानिस मन्दिर र देवी देवताका अगाडि पुगेपछि कसरी सादगी र निष्कलंकित भक्त बन्न खोज्छ ?

बाहिर बाहिर मिठो बोलेर सहकार्य, एकता, सद्भाव र शान्ती पक्षधरहरू कति रक्ति पिपासु छन् ? पैसाका लागि मान्छे कतिसम्म निर्दयी र पापी हुन्छ ? यही नै सिनेमाको कथा हो ।

यो कथा लेखक खगेन्द्र लामिछाने र निर्देशक दीपेन्द्र  खनालले विपीन कार्की, सौगात मल्ल, स्वस्तिमा खड्का, रबिन्द्र सिँह बानिया लगायतबाट भनेका छन् । भने फेरी पनी निर्देशक खनालले सफलतको झंडा गाडेका छन ।

‘पशुपति प्रसाद २ : भष्मे डन’को नायक भष्मे डन हो । जुन ‘पशुपति प्रसाद’मा मुख्य कलाकार मध्येका एक थिए । उनलाई ‘पशुपति प्रसाद’मा लेखक तथा निर्देशकले ग्रे जोनमा राखेका थिए । न हिरो न भिलेनको अवस्थामा रहेको भष्मे ‘पशुपति प्रसाद २ : भष्मे डन’मा आइपुग्दा हिरो बनेका छन् । उनकै कथामा यो सिनेमा बनेको छ ।

सात वर्ष पछि भष्मे कस्तो भयो ? उसमा के कस्ता परिवर्तन आयो होला ? ‘पशुपति प्रसाद’मा ग्रे जोनमा रहेको भष्मे सात वर्ष पछि बनेको ‘पशुपति प्रसाद २ : भष्मे डन’मा लेफ्ट वटा राइटतर्फ अगाडि बढ्छ ? यसकै सेरोफेरोमा यो सिनेमा करिब साढे २ घण्टा घुम्छ ।

भष्मेको प्रेम र ब्रत यसको ट्रेलरमै देखिएको थियो । कस्तो प्रेम र ब्रत हो ? सुनको दाँत त टिजरमै देखिएको थियो । के हो त्यसको कथा सिनेमाले यसकै वरिपरी दुई घुमाउँछ । जसरी जिन्दगी मसान घाटकै वरिपरि रहन्छ । त्यसैगरी एउटै बर्गका हरेक मान्छेको जिग्दगी करिब उस्तै हुन्छ । यो सिनेमाले देखाउँछ । जसरी भूकम्पले मन्दिरका भित्ताहरु चर्र्किएको छ । त्यस्तै मान्छेको जिन्दगी पनि छिया छिया भएका दृश्यहरूले मन छुन्छ ।

‘भष्मे डन’ जति गम्भीर कुरा गर्छ त्यति नै कमेडी पनि गर्छ । उसैले हो सिनेमामा दर्शकलाई हसाउँने । उसैले हो भावनात्मक र कठोर हुन सिकाउने । उसैले हो भोग्ने बदला र त्यसको परिणाम भोग्ने पनि । ‘पशुपति प्रसाद’ मार्फत भष्मे डन जन्मियो । भष्मे डनकै कारण ‘पशुपति प्रसाद २ : भष्मे डन’ जन्मिएको छ ।

भष्मे डन (विपिन)

देवीहरु रोएको त कस्तो नसुहाउने, ह्याँ… ।

माता (मैना)

म देवी हैन । दाइहरूको जस्तै मुटु छ मेरो पनि । म यस्तो भएर किन हिँड्छु थाहा छ तिमीलाई । जाने ठाउँ कहीँ नभए पनि म यहाँ आए ……

भष्मे डन

मैले ब्रत तोडेको हो तँ वाग्मतीको भ्यागुतको डाइट भैसक्थिस् । हेर अझै पनि केही बिग्रिएको छैन । आइज शान्ती वार्ता गरौं ।

कालीप्रसाद (सौगात मल्ल)

हेइ चुप । बहुत भयो तेरो ब्रत र वार्ता । जिन्दगीमा असान्ती मच्चार साला शान्ती वार्ता भन्छ ।

सिनेमाका यति मात्रै संवादले सिनेमामा समाजको क्रुरुपता, प्रेम, सर्पण, आक्रोश र बदला तथा कमेडी सिनेमामा रहेको देखाउँछ । जसले सिनेमालाई पूर्ण बनाउँछ । द्वन्द्व र प्रेम जसले सिनेमालाई स्ट्रक्चर दिएर रमाइलो बनाउँछ ।

अभिनयमा विपीन कार्की यसै पनि खारिएका कालाकार त्यसमा पनि रुचाएको भष्मेको उनको क्यारेक्टर राम्रो छ । अभिनयमा उनी सधैँअब्बल ।

सौगात मल्ल सम्भवत पहिलो पटक सिनेमामा लाउड छैनन् । उनको अभिनयले दर्शकको मन जित्छ । मधेसी क्यारेक्टरमा उनी सुहाएका छन् । स्वस्तिमाले आफूलाई फरक अवतारमा पनी दर्शकको मन जित्छिन् । सजन थापा मगर, माओत्से, वर्षा सिवाकोटी, रविन्द्र सिँह बानियाको अभिनय राम्रो छ । रविन्द्र छोटो भूमिकामा सशक्त पात्र हुन् सिनेमामा ।

सिनेमेटोग्राफरले (नीरज कंडेल) निर्देशक र लेखकको अन्तर्यमा रहेको कथाको मर्म दृश्यमा उतार्न सफल भएका छन् । लङ सट हुन् वा नाइटका सिन सिनेमोटोग्राफरले आफ्नो कला देखाएका छन् ।

सतप्रतिशत सिंक साउण्ड हो यो ‘पशुपति प्रसाद २ : भष्मे डन’ । सिंक साउण्डले सिनेमामा आत्मा भर्ने काम गरेको छ । छायांकनस्थल कै कलाकारको आवाज भएकाले डबिङ गर्दा सिनेमामा देखिने समस्याबाट सिनेका मुक्त छ ।

हिन्दू संस्कारका प्रयोग हुने शंखनाद तथा अन्य साउण्ड सिनेमाको व्याकग्राउण्ड स्कोरमा ठाउँठाउँमा प्रयोग गरिएको छ । यसले सिनेमालाई नाटकीय बनाउनबाट रोकेको छ, अर्थात् जीवन भर्ने काम गरेको छ । धेरै नपाली सिनेमाको व्याकग्राण्ड स्कोर कर्कस हुन्छ । यसमा ‘पशुपति प्रसाद २ : भष्मे डन’ सचेत देखिएको छ ।  सिनेमाको व्याकग्राण्ड स्कोरले नेपाली सिनेमाको स्पष्ट झल्को दिन्छ ।

कलरमा पनि सिनेमामा राम्रो काम देखिन्छ । रातको समयमा खिचिएका सिनमा कलर र लाइटको राम्रो संयोजनले सिनेमालाई थप सुन्दर बनाएका छन् ।

निर्देशक – दीपेन्द्र कुमार खनाल

लेखक – खगेन्द्र लामिछाने

कलाकार – विपिन कार्की, सौगात मल्ल, स्वस्तिमा खड्का, प्रकाश घिमिरे, लोकेन्द्र लेखक, रबिन्द्र सिँह बानियाँ, सजन थापा मगर आदि।

निर्माता – खगेन्द्र लामिछाने

ब्यानर – टुकी आर्ट्स