द सिनेमा टाइम्स, काठमाडौं । नेपाली सिनेमामा राम्रा गीत नआएको कति भयो ? यो मेकरभन्दा पनि दर्शकले मूल्यांकन गर्ने कुरा हो । किनकी मेकरको मूल्यांकनले भन्दा पनि दर्शकको मूल्यांकनले गीत लोकप्रिय हुने हो ।

दर्शकले ‘ह्रस्व दीर्घ’को गीतले सिनेमाका गीतमा देखिएको लोकप्रियताको खडेरी मेट्ने संकेत गरिरहेको छ । शुक्रबार साँझ रिलिज भएको ‘उठेर नाचिस्यो बसेर नाचिस्यो’लाई युट्युबमा दर्शकले सकारात्मक प्रतिकृया दिइरहेका छन् । युट्युबमा लोकेन्द्र उपाध्याय गीत हेरेर कमेन्ट गर्छन्, ‘नेपाली सिनेमामा धेरै समयपछि एक उत्कृष्ट, लोभलाग्दो गीत बनेको महसुस भयो ।’

भव्य सेटअपमा खिचिएको भिडियोलाई प्ले गर्ने सरल र सरस शब्द गीतमा छ । बोलिचालीको भाषामा प्रयोग हुने शब्द छन् । एकपटक सुनेपछि सहजै सम्झिन सकिने शब्द भएकाले यो गीतलाई दर्शकले मन पराइरहेका छन् ।

नम्रता सापकोटाको दिमागमा गीतको भिडियो बसेको छ । उनी मुक्तकण्ठले भिडियोको प्रशंसा गर्छिन् । गीतको भिडियो हेरेपछि युट्युबमा कमेन्ट गर्छिन्, ‘वाउ ! विगतका दिनमा नेपाली सिनेमाको गीतको भिडियो हेरेको भन्दा फरक छ । बलिउड भाइब्स आयो मलाई । एक्सिलेन्ट वर्क ।’

नम्रतालाई यसको भिडियो मेकिङले लोभ्याएको छ । भब्य सेटपमा खिचिएको गीतमा प्रोडुसरले भिडियोलाई उच्च क्वालिटी दिन लोभ गरेका छैनन् । यसले प्रोडक्सन भ्यालु देखिएको छ । जसले गीतको भिडियोलाई उकास्ने काम गरेको छ । यसैले नम्रताको मन जितेको छ । त्यसैले उनी यसलाई बलिउडसँग तुलना गर्छिन् ।

गीत सिनेमा पब्लिसिटीको राम्रो माध्यम मध्यको एक हो । राम्रो गीत बन्यो भने त्यसले सिनेमाको हाइप स्वाट्टै माथि उठाइदिन्छ । यस्ता उदाहरण थुप्रै छन् । केही अघिको सिनेमा ‘२ रुपैयाँ’को ‘कुटुमा कुटु’ र पछिल्लो समयको ‘बोक्सीको घर’को ‘बुझिन मैले’लाई राम्रो उदाहरणको रुपमा लिन सकिन्छ । यसलाई कसैले चाहेर पनि आँखा चिम्लिन सक्दैन ।

यो सम्भावना ‘ह्रस्व दीर्घ’को गीतले पनि देखाएको छ । अंकित थापा गीतमा कमेन्ट गर्दै लेख्छन्, ‘यो सिनेमा हेर्न म जस्तै अरु साथीहरू नि उत्सुक हुनुहुन्छ ।’

गीत रिलिज भएको धेरै भएको छैन । तर दर्शकको मन जितिरहेको छ । दर्शकले तारिफ गरिरहेका छन् । अञ्जना खड्काको कमेन्छ यस्तो छ, ‘रिलिज भएदेखि ११ पटक हेरेँ । तर अझै हेर्दैछु ।’ यो कमेन्टले गीतप्रति दर्शकले दर्शाएको माया प्रष्ट हुन्छ ।

गीतमा आएका अधिकांश कमेन्ट तारिफमा छन् । सिनेमाको प्रतिक्षा छ भन्ने छ । सिनेमाको यो गीतमा दुर्गेश थापाको संगीत, शब्द रचना र एरेञ्ज छ । गायनमा दुर्गेशसँगै सदीक्षा कट्टेलको स्वर छ । अधिकांश कमेन्ट दुर्गेशको तारिफमा छन् । दुर्गेशको कलाको खुलेर तारिफ गरिएका कमेन्ट छन् । जसमध्ये एउटा छोटो कमेन्ट उल्लेख गरौँ, हेम नाम गरेका व्यक्ति दुर्गेशको तारिफ गर्दै लेख्छन्, ‘खुसीको कुरा यो गीतको सर्जक दुर्गेश थापा । बाह ! मन जितेउ दाजु आज आएर ।’

धेरैले दुर्गेशको विगत जस्तो सुकै भए पनि यो गीतमा मन जितेको, राम्रो काम गरेको भन्दै प्रशंसाका शब्द प्रशस्तै खर्चिइएका छन् । यसले दुर्गेशको डेब्यु पार्श्व गायनमै उनी सफल भएको मान्न सकिन्छ । दुर्गेशको यो पहिलो सिनेमाको गीत हो । यसअघि ‘छ माया छपक्कै’को गीत तयार पारेका थिए । तर त्यो पब्लिसिटीका लागि तयार पारिएको प्यारोडी गीत थियो ।

गीतको भिडियोका नीता ढुंगाना र हरिहर अधिकारी छन् । नीताको नृत्यको खुलेर तारिफ भइरहेको छ । हरिहरलाई शुभकामना दिँदै सिनेमाको प्रतिक्षा रहेको बताइरहेका छन्, दर्शकले । गीतको भिडियोमा नीता र हरिहर केन्द्रमा छन्, जसलाई दर्शकले रुचाइरहेको कमेन्टबाट थाहा पाइन्छ ।

शब्दरचना, संगीत, गायन, कोरियोग्राफी र भिडियो मेकिङको कम्प्लिट प्याकेज भयो भने गीतले दर्शकको माया पाउँछ, रुचाइन्छ भनेर यो गीतलाई लिन सकिन्छ भन्ने दर्शकले देखाएको सद्भावमार्फत थाहा पाउन सकिन्छ । सिनेमाको यो गीतले रिलिज भएको एक दिनमा १० लाख ३० हजार बढि भ्युज पाउनुका साथै २६ हजार बढि लाईक र १ हजार ३ सय बढि कमेन्ट पाएको छ ।

संविधान दिवसको अवसर पारेर असोज ३ गतेबाट प्रदर्शनको तयारीमा रहेको सिनेमा ‘ह्रस्व दीर्घ’को पहिलो गीत ‘उठेर नाचिस्यो, बसेर नाचिस्यो’ शुक्रबार सार्वजनिक भएको हो । गीतमा सुष्मा सुनामको कोरियोग्राफी छ ।

नीता फिल्मस्को प्रस्तुतिमा निर्माण भएको सिनेमाका कार्यकारी निर्माता धनन्जय गलानी हुन् । सिनेमामा हरिहर अधिकारी, नीता ढुंगाना, ब्रह्मानन्दम, अली, कवीर दुहान सिंह, प्रदीप रावत, सुनिल वर्मा र प्रशान्त ताम्राकार, सञ्चीता लुईटेल, विपना थापा, सरोज खनाल, नरेन खड्का, गरिमा शर्मा, रवीन्द्र झा, आर्दश मिश्र, बुद्धि तामाङ र किरण केसीलगायतका कलाकारको अभिनय रहेको छ ।

अभिनेता हरिहर अधिकारीको कथा र प्रतीक पौडेल, निर्देशक पन्त र हरिहरको पटकथा तथा संवाद रहेको सिनेमालाई बलिउडका चर्चित सिनेमाटोग्राफर कवीरलालले खिचेका हुन् । सिनेमालाई चन्द्र पन्तले निर्देशन गरेका हुन् ।

यसअघि केही भोजपुरी सिनेमाको निर्देशन तथा करिब पाँच दर्जनभन्दा बढी नेपाली सिनेमामा द्धन्द्व निर्देशकको रुपमा काम गरिसकेका पन्तको यो निर्देशकीय डेव्यु नेपाली सिनेमा हो ।

अभिनेत्री निता ढुंगानाको लगानी निर्माण भएको यो सिनेमा नेपाली, तेलुगु र हिंन्दी गरी तीन भाषामा रिलिज हुनेछ । विजय वस्यालले पोस्टर डिजाइन गरेको सिनेमालाई मनोज राठी र उज्वल पौडेलको व्याङ्कटेस इन्टरटेनमेन्ट वितरण गर्दैछ ।