द सिनेमा टाइम्स, काठमाडौं – गत मंगलबार पशुपतिनाथको मन्दिर पारिपट्टी मृगस्थली पुग्दा गीतको छायांकन भइरहेको थियो । गीतमा थिए –भष्मे डन अर्थात् विपिन कार्की । भष्मे डनको भन्दा भिन्न गेटमा थिए विपिन । दर्जनौँ कोरसका बीचमा बसेर उनी नृत्यको स्टेप दिइरहेका थिए । ठूलो स्वरमा बजिरहेको गीतमा लिप्सिङसँगै बसेर स्टेप दिरहेका थिए ।
गीतको छायांकन त हो । तर, त्यो गीत थियो- पशुपतिप्रसाद २ भष्मे डनको । त्यसैले त त्यो गीतमा विपिन कार्की थिए !
विपिनलाई छायांकनस्थलमा देखेका उक्त क्षेत्र पुगेका सर्वसाधारण टक्क रोकिएर उनलाई नियाली रहेका थिए । उनीहरूलाई लाग्दो हो- भष्मेडनसँग एक सेल्फी हान्दिऊँ । र, समाजिक सञ्जाल फेसबुक र इन्टामा पोष्टि दिहालौं ।
तर, उनलाई भेट्न नदिन पहरा दिइरहेको थिए – ग्रूप फोरको सेकुरिटीले । सिनेमाको भिलेन भष्मे डन होला । फोटो खिच्न चाहने सर्वसाधारणका लागि भिलेन बनिरहेको थियो- ग्रुप फोर सेक्युरिटी ।
खैर, यो प्रसंग यतै बिट मारौं । तर, निसन्देह भष्मे डन सेलिब्रेटी हुन् । उनका लाखौँ फ्यान छन् । त्यसमध्ये पनि कति डाइहार्ट फ्यान होलान् ।
भष्मे डनको गीत छायांकन भइरहेको बाँयातर्फ एउटा बिल्डिङको कम्पाउण्डको गेटमा थिए, ग्रुप फोरका एक सेक्युरिटी । निर्माण पक्षसँग अनुमति लिएर उसले पंक्तिकारलाई बल्ल भित्र जान दिए । भित्र देखिइन् हिरोइन् आँचल शर्मा । सँगै थिए उनका को-एक्टर ।
नाच्ने सिक्वेन्स विपिनको रहेकाले त्यसैले आँचल र उनका को-एक्टर विश्राममा थिए । प्लाष्टिकको कुर्सीमा बसेर गफिरहेका थिए। के थियो गफको टपिक ?
‘के हुनु र दाइ सिनेमा स¥यो, तनाव छ नि !’, आँचल बोलिन् । त्यही दिन दिउँसो आँचल अभिनीत विकासराज आचार्यकृत सिनेमा ‘नाई नभन्नू ल-६’को प्रदर्शन मिति सरेको थियो । रिलिजको दुई दिन अगाडि सिनेमा सरेको थियो । ‘निर्माताको पैसाको लफडाका कारण चलचित्र विकास बोर्डले ढिलो सेन्सर सिफारिस गर्दा सिनेमाको रिलिज डेट सरेको हो’ निर्माण पक्षले कारण बतायो ।
‘नाई नभन्नू ल’ आफैँमा ब्राण्ड बोकेको सिनेमा हो । तर, यसपटक यसको हाइप सोचे जस्तो थिएन ।भलै निर्माण पक्ष यसलाई स्वीकार्न तयार छैन ।
‘के हुन्छ दाइ अब ?’ आँचल जिज्ञासा राखिरहेकी थिइन् । अनुहारमा कौतुहलता थियो, अब के होला भन्ने । अनि आफैँ भन्दै थिइन्, ‘जेहुन्छ, राम्रैका लागि हुन्छ है, अब पब्लिसिटीको समय पाइयो । सिनेमा आउँदैछ भनेर जानकारी नपाएका दर्शकसम्म पुग्ने समय भयो ।’ निर्माण पक्षले ‘नाई नभन्नू ल-६’ अब यही वैशाख १५ गते आउने बताएको छ ।
आँचल गफि रहेकी थिइन् । कम्पाउण्ड वालको प्वालबाट चिहाएर हेर्नेहरूको घुइँचो थियो । उनी बेलाबेला कम्पाउण्ड वालको प्वालबाटआफूलाई चिहाएर हेर्नेहरूलाई हात हल्लाएर ‘हाई’ भनिरहेकी थिइन् । यो क्रम लामै चल्यो ।
नृत्यको ड्रेसमै रहेकी उनलाई स्पट व्वाई बोलाउन आए । भने- तपाईंको सुट सुरु हुन लाग्यो, आउनूस् रे !
‘मेरो मेकअप ठिक छ ?’ आँचलले मेकअप आर्टिस्टलाई सोधिन् । ठिक छ भनेपछि उनी लागिन्- सेटतर्फ ।
सेटतर्फ जाँदा उनी भन्दै थिइन्- ‘आज यो ड्रेसको काम चाहीँ सक्नु प¥यो ।’
‘नसकिए, भोलि पनि लगाउने,’ सायद ड्रेस डिजाइनर थिए बोल्ने ।
गीतको छायांकन भएकाले होला सायद, दीपेन्द्र कुमार खनाल केही फुर्सदिला थिए । किन भने गीत त प्रायः कोरियोग्राफरले हेर्छ । त्यसैले दीपेन्द्रलाई केही आराम मिलेको थियो । कम्पाउण्डको ठूलो रुखको छहारीमा उनी छत्रे टोपी लगाएर बसिरहेका थिए । परबाट देख्दै लाग्थे उनी निर्देशकजस्ता । नेपाली समाजमा छत्रे टोपी लगाएर ठूलो क्यामेरा अगाडि बसेको बिम्ब छ, सिनेमा निर्देशकको ।
फुर्सलादिला थिए, एकछिन गफिए दीपेन्द्र पनि । सिनेमाको कथाको थोरबहुत कुरा गरे । यसपटकको स्क्रिप्ट लेखनको फरक अनुभव सुनाए । स्क्रिप्ट नै सिनेमाको मेरुदण्ड भएको यथार्थ भुल्न नहुने सुनाए । ‘अनि पो बल्ल सिनेमा बलियो हुन्छ, आम दर्शकलाई मन पर्नेहुन्छ,’ उनले निष्कर्ष सुनाए ।
दीपेन्द्रले सिनेमा खिच्दाको सकस सुनाए । स्टारलाई भिडबाट जोगाएर सिनेमा खिच्दा हुने कठिनता सुनाए । तर, त्यसैभित्र रहेको रोमाञ्चकता र सम्भावित सफलता सुनाए । अनि सुनाए- भष्मे डनको स्टारडम । जुन उनले पशुपतिमा देखे ।
दीपेन्द्र कुमार खानालले निर्देशन गरिरहेको सिनेमालाई खगेन्द्र लामिछानेले लेखेका हुन् । निर्माता पनि खगेन्द्र र दीपेन्द्र स्वयं हुन् ।सिनेमामा विपिन कार्की, स्वस्तिमा खड्का, सौगात मल्ल, प्रकाश घिमिरे, मिश्री थापा, साजन थापालगायत कलाकारकोअभिनय रहेको छ ।
‘पशुपतिप्रसाद-२ भष्मे डन’ यही दसैंमा रिलिज हुँदै छ । सिनेमा घोषणा लगत्तै वर्षकै प्रतिक्षित सिनेमा बनेको छ ।
>~दिनेस सिटौला ~<
प्रतिक्रिया