द सिनेमा टाइम्स, काठमाडौं – कुनै समयका सर्वाधिक रोजाइ र मागका कलाकार हुन्, अभिनेता पल शाह । केही समयको बाद्यात्मक ब्रेक पछि उनीयतिबेला काममा फर्किएका छन् । म्युजिक भिडियोबाट काम सुरु गरेका पल शनिबार अबेर राति सिनेमा हेर्न लाबिम मल पुगे । आँचल शर्माको अनुरोधलाई स्वीकार गर्दै पल ‘नाईं नभन्नू ल-६’ हेर्न लाबिम मल पुगेका थिए ।

पल सिनेमा हेरेर निस्किँदा रातको साढे ९ बजिसकेको थियो । तर उनलाई मिडियाले कुरिरहेका थिए । त्यसैले उनी आँचलसँगै उभिएर सञ्चार माध्यमसँग केही समय बोले । उनले आँचलको जमेरै तारिफ गरे । सिनेमाको सेन्ट्रल क्यारेक्टरमा आँचल नै रहेको भन्दै पलले आँचलको अभिनयमा सुधार भएको भन्दै तारिफ गरे । ‘सिनेमाको राम्रो पक्ष नै उहाँको अभिनय लाग्यो । आँचलको काम देखेर मलाईखुसी लाग्यो,’ पलले आफ्नो तारिफ गरिरहँदा उनी सुनिरहेकी थिइन् । भनिरहेकी थिइन्- थ्याङक्यू !

पलका प्रशंशाका शब्द सुनिसकेपछि बोल्ने पालो आँचलको । उनी पनि पलप्रति अनुग्रहित हुँदै भनिन्, ‘म भन्थेँ नि सिनेमा इन्ड्रस्टीमा मेरोअन्ली वान एण्ड वान साथी छ भनेर । उहाँ अहिले यहाँ हुनुहुन्छ । आइदिनु भएर सिनेको हेरिदिएको र साथ र सपोर्टका लागि थ्याङक्यू।’

पलले ‘नाईं नभन्नू ल-६’को मात्रै तारिफ गरेनन् । आँचलको अघिल्लो सिनेमा ‘झिँगेदाउ’को पनि तारिफ गरे । आफूले ‘झिँगेदाउ’ पनि राम्रो भएको सुनेको भन्दै आफू काठमाडौंमा भएको भए उक्त सिनेमामा पनि आँचललाई सहयोग गर्ने सुनाए । आँचल सँधैँ नयाँ कुरा सिक्न चाहने र प्रयास गर्ने कलाकार रहेको पनि पलले बताए ।

आँचल उत्साहित थिइन् । उनले भनिन्, ‘आज हामी आँप जस्तो देखिएका छौँ नि ।’ आफूले लगाएको हल्का हरियो र पलले लगाएको ज्याकेटको पहेँलो कलरतर्फ संकेत गर्दै उनले भनिन् । आँचल र पलको प्रोफेसनल जोडीलाई ‘आँप’को संज्ञा दिइएको थियो । त्यसैलाई आँचलले स्मरण गराएकी थिइन् ।

डेढ वर्षपछि सिनेमा हेर्दा आफूलाई नयाँ अनुभव भएको भन्दै पलले भने, ‘मोबाइल चलाउँला पनि मलाई सिनेमा हेरे जस्तै नयाँ अनुभव भएको थियो । कति ठूलो जस्तो लागिरहेको छ ।’

आँचलसँग आफ्नो छुट्टै केमेस्ट्री रहेको भन्दै पलले आफ्नो पहिलो सिनेमामा सँगै काम गरेको स्मरण गरे । म्युजिक भिडियोमा काम गरिरहेका बेला आफ्ना फ्यानले तपाईको सिनेमा पनि आउनु पर्छ भनिरहेका बेला आफूलाई विकासराज आचार्यले ब्रेक दिएको भन्दै उनले ‘नाई नभन्नू ल’सँग आफ्नो विशेष लगाव र सम्बन्ध रहेको उनको भनाइ छ । आफूले सिनेमा हेरिरहँदा ‘नाई नभन्नू ल-४’को याद आएको उनले स्मरण गरे ।

आँचल र आफ्नो केमेस्ट्री राम्रो रहेको भन्दै कुनैपनि समय आँचल र आफ्नो सिनेमा आउन सक्ने पलले संकेत गरे । अफरहरू पनि आइरहेको तर अझै राम्रो स्क्रिप्टको पर्खाइमा रहेको उनले बताए । ‘नाई नभन्नू ल’को सिरिजमा नै यो सिरिज राम्रो बनेको पलले बताए । यद्यपि, चौथो सिरिज नै आफूलाई मन पर्ने पनि बताए ।