द सिनेमा टाइम्स, काठमाडौं – काठमाडौं महानगरपालिकाले आजदेखि काठमाडौं महानगरपालिकाभित्रका सिनेमा हलमा हिन्दी सिनेमा प्रदर्शनमा रोकलगाएको छ ।

‘आदिपुरुष’मा रहेको विवादित संवाद हटाउन तीन दिनको समय दिए पनि उक्त सिनेमाको सो संवाद नहटाइ भारतसहित विश्वभर चलाइएको भन्दै काठमाडौंका हलमा आजदेखि कुनै पनि हिन्दी सिनेमा चल्न नदिने महानगरपालिकाले जनाएको छ ।

यसअघि महानगरका मेयर बालेन शाहले उक्त सिनेमामा रहेका संवाद हटाउन तीन दिनको समय दिएका थिए । मेयर बालेन शाहले आजदेखि महानगरका सिनेमा हलमा हिन्दी सिनेमा चल्न नदिने स्पष्ट पारेका छन् । 

नेपालको स्वतन्त्रता, स्वाधिनता र स्वाभिमानलाई अक्षुण राखी राष्ट्रहितको रक्षा गर्नु प्रत्येक सरकार, सरकारी निकाय, गैरसरकारी क्षेत्र र नेपाली नागरिकको पहिलो कर्तव्य हुने भन्दै उनले हिन्दी सिनेमा चल्न नदिने बताएका छतन् । ‘नेपालको संविधानको धारा ५ र ५६ कोउपधारा (६) ले संघ, प्रदेश र स्थानीय सरकारलाई राष्ट्रिय हितको संरक्षण गर्ने जिम्मेवारी तोकेको छ । उक्त सिनेमा यथावत् प्रदर्शनभएमा नेपालको राष्ट्रियता, सांस्कृतिक एकता र राष्ट्रिय विभूतिमाथि ठाडो प्रहार भई अपूरणीय क्षति हुने देखिन्छ,” उनले सामाजिक सञ्फेसबुकमा लेखेका छन्, “उक्त सिनेमाबाट नेपालमाथि सांस्कृतिक अतिक्रमण भएको हुँदा यस महानगरपालिकाको गम्भीर  ध्यानाकर्षणभएको छ ।’

काठमाडौं महानगरपालिका क्षेत्रभित्र राष्ट्रहित विपरीतको सिनेमाको प्रदर्शनलाई निषेध गरेर मात्र देशभित्रका अन्य क्षेत्र र विदेशमा सो सिनेमा प्रदर्शन हुन दिने हो भने त्यसले भ्रामक तथ्य स्थापित गर्ने उनको भनाइ छ । त्यसैले उक्त सिनेमाबाट आपत्तिजनक अंश नहटाएसम्म काठमाडौ महानगरमा कुनै पनि भारतीय सिनेमा प्रदर्शन गर्न सोमबारदेखि निषेध गरिएको उनले लेखेका छन् ।