काठमाडौं । नायिका साम्राज्ञी राज्यलक्ष्मी शाहले गाली बेइज्जती मुद्दामा सफाइ पाएकी छन् ।

२०७७ साल साउन ९ गते अभिनेता भुवन केसीले जिल्ला अदालत काठमाडौंमा अभिनेत्री साम्राज्ञी आरएल शाहविरुद्ध १० करोड क्षतिपूर्तिको माग गर्दै गाली बेइज्जती मुद्दा हालेका थिए ।

अदालतमा मुद्धा परेको करिब तीन वर्षपछि बुधबार भएको सुनुवाइमा भुवनले मुद्धा हारेका छन् । न्यायाधीश वासुदेव पौडेलको एकल इजलासले जाहेरीकर्ता केसीको दाबी नपुग्ने फैसला गरेको हो ।

यता, अभिनेत्री शाहले मुद्दा जितेपछि आफूले लामो युद्ध जितेको भन्दै वकिल, सपोर्टर तथा शुभचिन्तकलाई धन्यवाद भनेकी छन् । मुद्दा जित्न सहज नभए पनि आफूले लामो समयपछि सफल भएको भन्दै उनले विशेषगरी वकिललाई नाम नै लिएर धन्यवाद भनेकी छन् ।

मुद्दा जिते लगत्तै सामाजिक सञ्जाल इन्स्टाग्राममा आएकी उनले अब आफ्नो नयाँ यात्रा सुरु हुने बताएकी छन् ।