द सिनेमा टाइम्स,काठमाडौं – झरना थापा निर्देशित सिनेमा ‘एक भगवत् गीता’को टिजर सार्वजनिक भएको छ । सार्वजनिक टिजरमा सिनेमाका मुख्य कलाकारहरू फिचर्ड छन् ।

एक मिनेट ३३ सेकेन्ड लामो टिजरमा विपिन कार्की र सुहाना थापा केन्द्रमा देखिन्छन् । सुनील कुमार थापाको निर्माणमा भदौ २९ गते रिलिज हुने सिनेमामा कमलामाईको अवतारमा विपिन कार्की फिचर्ड छन् ।

महिलाको रौद्र भेषमा देखिने विपीन हातमा खुँडा बोकेर मान्छे ढाल्दै हिँड्छन् । उनी सिनेमाको खलपात्रको रुपमा रहेको टिजरले संकेत गर्छ । तर, सिनेमाको कथा के हो भनेर सुहाना र अर्का मुख्य कलाकार धिरज मगरको उपस्थितिले प्रष्ट्याउँदैन । टिजरले सस्पेन्स क्रिएट गरेको छ । ‘एक भगवत् गीता’ यो वर्षको बहुप्रतिक्षित सिनेमामध्ये एक हो । त्यसैले पनी टिजरले दर्शकहरुमा सिनेमाप्रति उत्सुकता बढ्ने निश्चित छ ।

झरना थापाद्वारा निर्देशित सिनेमामा कबीर खड्का, जेविस र जेविन श्रेष्ठ, संजोग रसाइली, मुकेश झा, अनुराग कुँवर, राम कैलाश ठाकुर, धिरज ठाकुरलगायतको पनि अभिनय छ । सिनेमाको कथा निर्देशक थापा स्वयंको हो । झरनासँगै सरिन पोखरेल, परिक्षेद सेन, पुरुषोत्तम ढंगेल र कृष्णको पटकथा रहेको सिनेमामा परिक्षेद र पुरुषोत्तमको संवाद छ ।

राजेश श्रेष्ठको छायांकन, मित्र डि गुरुङको सम्पादन, हिमाल केसीको द्वन्द्व, कविराज गहतराजको कोरियोग्राफी तथा शैलेश श्रेष्ठको ब्याकग्राउण्ड स्कोर रहेको छ । टिजर साहिल खानले काटेका हुन।