द सिनेमा टाइम्स, काठमाडौं – निर्माता तथा अभिनेता दीपकराज गिरीको लगानीमा बनेको सिनेमा हल ‘ऐंचो पैंचो’ सिनेमाबाट सञ्चालनमा आउने भएको छ। ‘ऐंचो पैंचो’ भदौ १४ गतेबाट रिलिज हुँदैछ । हलमा दीपक-दीपाश्री निरौलासँगै निर्मल शर्मा तथा ‘छक्का पञ्जा’का निर्माण समूह र सञ्चारकर्मीप्रभात रिमालको कम्पनीको लगानी रहेको छ ।

कृषा चौलागाईको निर्देशनमा बनेको सिनेमा ‘ऐंचो पैंचो’बाट आफ्नो हल सञ्चालनमा आउने दीपकराजले बताएका छन् । यसको एकहप्तापछि बलिउड सिनेमा ‘जवान’ भदौ २१ गते रिलिज हुँदैछ ।

हिन्दीभन्दा पनि नेपाली सिनेमाबाटै हलको ओपनिङ गर्ने योजना रहेको दीपकले बताएका छन् । यसअघि यो सिनेमा हल साउन १ गतेबाटसञ्चालनमा ल्याउने बताइएको थियो । तर, निर्माण सम्पन्न नभएकाले पूर्वनिर्धारित समयमा हल सञ्चलनमा आउन सकेन ।

नयाँ बानेश्वर-शंखमुल रोडमा निर्माण भइरहेको सिनेमा हल महलको माथिल्लो दुई तलामा छ । दश करोड निर्माण लागत रहेको हलमा दुईवटा स्क्रिन छन् । हलमा चारसय सिट छन् । यो हललाई नेपालको दोस्रो ठूलो मल्टिप्लेक्स चेन आईएनआईले व्यवस्थापन गर्नेछ ।