द सिनेमा टाइम्स, काठमाडौं । निश्चल बस्नेत निर्देशित सिनेमा ‘दिमाग खराब’ले आफ्नो प्रदर्शनको ५१ औं दिन मनाएको छ। सिनेमाले राजधानीको रञ्जना सिनेप्लेक्समा शनिबार प्रदर्शनको ५१ औं दिन मनाएको हो । सिनेमा कार्तिक २४ गते सार्वजनिक प्रदर्शनमा आएको थियो ।

सिनेमा अहिले पनि नेपालसँगै डायस्पोरामा समेत प्रदर्शन भइरहेको छ । चौतर्फी तारिफ बटुलेको सिनेमाले ५१ दिन मनाउँदै आफ्नो सिक्वलको समेत घोषणा गरेको छ । ‘दिमाग खराब’ले केक काट्दै प्रदर्शनको ५१ औं दिनको खुशी साटेको हो । सो कार्यक्रममा सिनेमाका कलाकार तथा प्राविधिकहरुको राम्रै उपस्थिति रहेको थियो । कार्यक्रममा दयाहाङ राई, खगेन्द्र लामिछाने, स्वस्तिमा खड्का, विजय बराल, रमा थपालिया, निर्देशक निश्चल बस्नेत, निर्माता सुरज बम ठकुरी लगायतको उपस्थिति थियो ।

५१ औं दिनको केक काटेपछि निश्चलले खुशी व्यक्त गरे । उनले घोषित सिक्वल २०८३ सालको दशैंमा रिलिज हुने जानकारी दिए । ‘धेरैले सिक्वेल आउँछ कि आउँदैन भनेर सोध्नुभएको छ । ‘दिमाग खराब’को सिक्वेल आउँछ । २०८३ सालको दशैंमा सिक्वेल आउँछ’, निश्चलले भने, ‘यो सिनेमाबाट हामीले जे चीज भन्न खोजेका छौं, सिक्वेलमा पनि हामीलाई लागेको र राष्ट्रको हितमा हुने विषय नै हुनेछ ।’ निश्चलले ६ वर्षपछि ‘दिमाग खराब’को निर्देशन गरेका हुन् । सिनेमाले १० करोडमाथिको व्यापार गरिसकेको छ ।

सिनेमाका निर्माता रौनक विक्रम कडेल हुन भने कार्यकारी निर्मातामा सुरज बम मल्ल ठकुरी रहेका छन् । काठमाडौंमा सिनेमाका वितरक गोविन्द शाही हुन् भने काठमाडौं बाहिर मनोज राठी हुन् । आकाश बरालको लेखन र मनोज पण्डित स्क्रिप्ट डाक्टर रहेको सिनेमा राजनीतिक विषयमा केन्द्रित रहेर निर्माण भएको हो ।

सिनेमामा सुशन प्रजापतिको छायांकन, निमेष श्रेष्ठको सम्पादन, जयन के बाइबा र बाबुल गिरीको संगीत, राजकुमार उप्रेतीको द्वन्द्व निर्देशन तथा रोहित शाक्यको ब्याकग्राउन्ड स्कोर छ ।