द सिनेमा टाइम्स, काठमाडौं – सर्वाधिक प्रतिक्षित मध्येको एक सिनेमा ‘डिग्री माइला’को ट्रेलर युट्युब ट्रेन्डिङमा प्रवेश गरेको छ । शुक्रबार अपराह्न सार्वजनिक ट्रेलर २४ घण्टा नपुग्दै युट्युब ट्रेन्डिङमा प्रवेश गरेको हो ।
यता, ट्रेन्डिङको मुभी सेक्सनमा भने ‘डिग्री माइला’को ट्रेलर एक नम्बरमा आइसकेको छ । ‘महाजात्रा’को ट्रेलरलाई उछिन्दै ‘डिग्री माइला’को ट्रेलर एक नम्बरमा आएको हो ।
यो समाचार तयार पर्दा ट्रलेर युट्युब ट्रेन्डिङको २७ नम्बरमा छ । तीन लाखभन्दा माथि दर्शकले हेरिसकेका छन् । १५ हजारभन्दा धेरैले लाइक गरेको ट्रेलरमा एक हजारभन्दा धेरै कमेन्ट आएको छ ।
कमेन्टमा एक फेसबुक प्रयोगकर्ता लेख्छन्- ०८० सालमा ‘जारी’ सुपरहिट ०८१ ‘डिग्री माइला’ झनै सुपरहिट होला, शुभकमना ।
विजय चाम्लिङ नाम गरेका फेसबुक प्रयोगकर्ता लेख्छन् – जिवन्त अभिनयको परिभाषा हुनुहुन्छ दयाहाङ राई । सधैँ झैँ उत्कृष्ट । ०८१ साल दाजैले नेपाली सिनेमा क्षेत्रलाई अर्को उच्च अहोदामा पुर्यानु हुनेछ । एकदम विश्वस्त छु । शुभकामना !
अर्का फेसबुक प्रयोगकर्ता डीबी सागर थापा लेख्छन् – रामबाबु गुरुङको उत्कृष्ट काम देख्न पाइने भयो । धेरैपछि हल तताउला जस्तो छ । शुभकामना !
सामाजिक सञ्जाल प्रयोगकर्ताका यी र यस्ता प्रतिक्रियाले दर्शकले ट्रेलर मन पराएको देखिन्छ ।
रामबाबु गुरुङ निर्देशित सिनेमाको ट्रेलरले नेपाली ग्रामीण क्षेत्रको शिक्षाको अवस्था र स्तरसँगै शैक्षिक मेनपावरको टड्कारो अभावलाई पेस गरेको छ ।
अवसरको अभावमा शिक्षित युवा गाउँ नबस्दा गाउँका विद्यालय तथा क्याम्पसको शैक्षिकस्तर कति नाजुक छ भन्ने ट्रेलरले देखाएको छ । अंग्रेजी विषयमा डिग्री गरेका युवा गाउँ पुग्दा उसलाई जबरजस्ती अंग्रेजी पढाउन राख्नु पर्ने अवस्थालाई ट्रेलरले देखाएको छ ।
अन्यथा क्याम्पसको सम्बन्धन नै खारेज हुने अवस्थामा पुगेको चित्रण गरेको ट्रेलरले सिनेमाको मुख्य पात्र दयाहाङले खोज्ने भाउ प्रस्तुत गरेको छ । मल्टिनेसनल कम्पनीका दशौँ लाखको जागिर अफर गर्दा पनि नगरेको भन्दै दयाहाङ आफूलाई गाउँको क्याम्पसले पे गर्न नसक्ने भन्दै फूर्तीफार्ती लगाइरहन्छन्, यही कथाभित्रको डार्क कमेडीले ट्रेलरलाई स्वादिलो बनाएको छ । यसैलाई दर्शकले रुचाएको देखिएको छ ।
निर्देशक रामबाबुको आफ्नै ब्रान्ड भ्यालु, बासुरी फिल्मसको ब्रान्ड, दयाहाङको क्रेज र दर्शकले ट्रेलरलाई दिएको प्रतिक्रियाले सिनेमालाई शुभसंकेत दिएको छ । यो सिनेमालाई पनि दर्शकले रुचाउने पूर्वानुमान लगाउन सकिन्छ ।
दयाहाङले केही वर्ष अगाडि निर्देशन गरेको ‘डिग्री’ माइला नाटकमा आधारित सिनेमा हो यो । सिनेमाले वेरोजगारीको कथा भन्नेछ ।
सिनेमालाई बाँसुरी फिल्मस्ले कबड्डी फिल्मस् तथा सुस्मा फिल्मस्सँग मिलेर निर्माण गरेको हो । सिनेमामा दयाहाङ राई, आँचल शर्मा, विजय बराल, माओत्से गुरुङ, बुद्धि तामाङ, प्रकाश घिमिरेलगायतको अभिनय छ । अभिनेत्री ऋचा शर्मालाई विशेष भूमिकामा देख्नसकिनेछ ।
निमेष श्रेष्ठको सम्पादन तथा रोहित शाक्यको ब्याकग्राउन्ड म्युजिक रहेको सिनेमालाई क्यामराम्यान शिवराम श्रेष्ठ तथा राइलीएसशिनले खिचेका हुन् । चर्चित नेपाली आहान ‘किन चाउरिस मरिच आफ्नै रागले’ सिनेमाको ट्यागलाइन हो । सिनेमा आगामी चैत ३० गते रिलिज हुनेछ ।
प्रतिक्रिया