द सिनेमा टाइम्स, काठमाडौं – आगामी जेठ १० गते विश्वव्यापी रूपमा एकसाथ रिलिज हुने सिनेमा ‘पुजार सार्की’को ट्रेलर सार्वजनिक गरिएको छ।

समारोहमा यस सिनेमाका कलाकारहरू प्रदीप खड्का, आर्यन सिग्देल, अञ्जना बराइली, परीक्षा लिम्बु, मोहन निरौला, लोकेन्द्र लेखक, सुवास गजुरेल, विद्या कार्की, शङ्कर आचार्य, निर्देशक दिनेश राउत, लेखक विकास सुवेदी, निर्माता सुवास भुसाल लगायतको उपस्थिति थियो ।

ट्रेलरमा जातीय विभेदले समाजका हरेक तह र तप्काका मानिसहरूलाई पारेको व्यक्तिगत, मानसिक र सामाजिक असरलाई उतारिएको छ । ट्रेलरमा अभिनेता पल शाहलाई समाज परिवर्तन गर्न अग्रसर युवाको भूमिकामा प्रस्तुत गरिएको छ । ट्रेलर रिलिज समारोहमा भने शाह उपस्थित थिएनन् ।

‘पुजार सार्की’लाई दिनेश राउतले निर्देशन गरेका हुन् । दर्शकको रोजाइका तीन स्टारहरूको अभिनय रहेको यस सिनेमालाई लिएर चर्चा भइरहेको छ । ‘प्रसाद’, ‘क्लासिक’, ‘नोभेम्बर रेन’, ‘प्रकाश’ लगायतका सफल सिनेमाका निर्देशक राउतले हालसम्म दर्शकलाई निराश बनाएका छैनन् । सिनेमालाई विकास सुवेदीले लेखेका छन् ।

सिनेमालाई सुवास भुसालले निर्माण गरेका हुन् । किङ्गडम नेटवर्कको ब्यानरमा बनेको यो सिनेमा नेपालमा आरआर फिल्मसले वितरण गर्दै छ भने अन्तर्राष्ट्रिय बजारमा एमएसएम इन्टरटेन्मेन्टले वितरण गर्दै छ । डिजिटल वितरण ओएसआर डिजिटलले गरेको छ ।

निर्माता भुसालले नै सिनेमका लागि सङ्गीत तयार गरेका छन्। हर्क साउद, बि. पाण्डे, दिनेश राउत र गणेश शाहीले यसका गीत रचना गरेका छन् भने प्रकाश सपूत, शान्ति श्री परियार, केतन क्षेत्री, देबेन्द्र बराल र मुना थटालले स्वर दिएका छन् । राजेश श्रेष्ठको डिओपी रहेको ‘पुजार सार्की’लाई भरत रेग्मीले सम्पादन तथा सुप्रिम पराजुलीले कलर ग्रेडिङ तथा हिमाल केसीले द्वन्द्व निर्देशन गरेका छन्। पोस्टर डिजाइन रोयल भीमसेन र ट्राइडेन्ट कन्सेप्टले गरेका हुन्।