द सिनेमा टाइम्स, काठमाडौं – भदौ १४ गते शुक्रबारबाट प्रदर्शनमा आउने सिनेमा ‘वर एण्ड वधु’को बुधबार ललितपुरको लाबिम मलमा भव्य प्रिमियर शोको आयोजना गरिएको छ ।

निर्देशक मिलन चाम्सले सिनेमाको प्रिमियरलाई भव्य बनाउनका लागि कुनै कसर बाँकी राखेका थिएनन् । ‘रेड कार्पेट मिरर वाल्क’ प्रिमियर नाम दिइएको कार्यक्रममा फिल्म क्षेत्रका सिनेमाकर्मी, पत्रकार र राजनीतिज्ञहरुको उपस्थिती थियो ।

एलआरके इन्टरटेन्मेन्टको व्यानरमा निर्माण भएको सिनेमा हेर्नका लागि राप्रपा अध्यक्ष राजेन्द्र लिङ्देन, बागमती प्रदेशका सभामुख भुवन पाठक, बरिष्ठ कलाकारद्धय मदनकृष्ण श्रेष्ठ र हरिवंश आचार्य, अभिनेत्री मिरुना मगर, उषा रजक, पशुपति राई, निर्देशक ज्ञानेन्द्र देउजा, दीपाश्री निरौला, सुयोग गुरुङ, हाँस्य कलाकारहरु केदार घिमिरे, जितु नेपाल, निर्माता सरोज न्यौपाने लगायत हल पुगेका थिए ।

सिनेमाका मुख्य कलाकारहरु आँचल शर्मा, किरण केसी, विवेक कर्माचार्य, कुसुम शर्मा, विजु पार्की लगायत पनि हल पुगेका थिए । सिनेमा हेरेपछि राप्रपाका अध्यक्ष राजेन्द्र लिङ्देनले हरेक कोणबाट उत्कृष्ट बनेकाले सबैलाई हेर्न आग्रह गरेका छन् । बरिष्ठ कलाकारद्धय हरिवंश आचार्य र मदनकृष्ण श्रेष्ठले पनि सिनेमाको दृश्य, कथावस्तु, कलाकारको अभिनय र निर्देशकिय पाटोको तारिफ गरेका हुन् ।

सिनेमा हेरेपछि निर्देशक दीपाश्री निरौलाले समग्रमा उत्कृष्ट बनेकाले आँखा शित्तल हुने सिनेमा हेर्न पाएकोमा खुशी व्यक्त गरिन् । कलाकार केदार घिमिरेले पनि सिनेमा नै राम्रो बनेको प्रतिक्रिया दिए । निर्देशक सुयोग गुरुङले सिनेमा हेर्दा आफूलाई निकै रमाइलो लागेको भन्दै निर्देशक मिलन चाम्सले दर्शकको चाहना अनुसार बनाएको बताए ।

अभिनेत्री मिरुना मगरले आँचल शर्मालाई यो भूमिका निकै सुहाएको प्रतिक्रिया दिइन् । उनले, आँचलको भूमिकाले दर्शकको मन जित्ने विश्वास व्यक्त गरिन् । सिनेमा हेरेका अधिकांशले डेव्यु अभिनेता विवेक कर्माचार्यको कामको पनि खुलेरै तारिफ गरेका छन् । विवेक नयाँ जस्तो नलागेको प्रिमियरमा सिनेमा हेरेका अधिकांश पाहुनाको प्रतिक्रिया थियो ।

सिनेमामा विजय लामा, किरण केसी, हिउँवाला गौतम, सरिता लामिछाने, अंशु महर्जन, दिनेश काफ्ले, यमन श्रेष्ठ, सृष्टि खड्का, गरिमा शर्मा, रविन्द्र खड्का, कुसुम शर्मा, विजु पार्की, हिमेश पन्त लगायतको पनि अभिनय छ । विवेक र कुसुमको यो डेब्यु सिनेमा हो ।

सिनेमामा सुदिप बरालको छायांकन तथा प्रदीप भारद्वाजको लेखन छ । रोमानियामा र काठमाडौंमा सिनेमाको छायांकन गरिएको हो । सिनेमामा जानुका थापा निर्माता र डाक्टर अमित रिजाल कार्यकारी निर्मातामा छन् ।