द सिनेमा टाइम्स, काठमाडौं – मिलन चाम्स निर्देशित सिनेमा ‘वर एण्ड वधु’ आज शुक्रबारदेखि सोलो रिलिज भएको छ । लामो समयपछि हलमा नेपाली सिनेमा सोलो रिलिज भएको हो ।

अभिनेत्री आँचल शर्मा र डेव्यु अभिनेता विवेक कर्माचार्य अभिनीत सिनेमाले मल्टीप्लेक्सदेखि सिगंल स्क्रिनसम्म राम्रो शोज पाएको छ । सिनेमाले प्रदर्शनपूर्व पोखरा र काठमाडौंमा अयोजित प्रिमियर शोमा राम्रो प्रतिक्रिया पाएको थियो । यसको प्रभाव सिनेमाको व्यापारमा देखिने विश्वास निर्माण टिमको छ ।

सिनेमाले दुई परिवारबीचको दुश्मनी, प्रेम र धोकाको कथा उठाएको छ । सिनेमामा आँचल र विवेकका अलवा विजय लामा, किरण केसी, अंशु महर्जन, गरिमा शर्मा, विजु पार्की, सरिता लामिछाने, सृष्टि खड्का, हिउँवाला गौतम, रविन्द्र खड्का, कुसुम शर्मा, हिमेश पन्त लगायतको पनि अभिनय रहेको छ ।

एलआरके प्रोडक्शनको ब्यानरमा निर्माण भएको सिनेमामा सुदिप बरालको छायांकन तथा प्रदीप भारद्वाजको लेखन छ । सिनेमाले सामाजिक कथावस्तुलाई रमाइलो शैलीमा प्रस्तुत गर्ने छ । रोमानियामा र काठमाडौंमा सिनेमाको छायांकन गरिएको हो । सिनेमामा जानुका थापा निर्माता र डाक्टर अमित रिजाल कार्यकारी निर्मातामा छन् ।