द सिनेमा टाइम्स, काठमाडौं । कार्तिक ३० गते शुक्रबारबाट प्रदर्शनको तयारीमा रहेको सिनेमा ‘ह्रस्व दीर्घ’ कलाकार र मेकिङका कारण चर्चामा छ । अभिनेत्री नीता ढुंगानाको लगानी रहेको सिनेमाबाट सफल द्धन्द्व निर्देशक चन्द्र पन्तले निर्देशनमा डेव्यु गरेका छन् ।

उनले यसअघि केही भोजपुरी सिनेमाको निर्देशन गरिसकेका छन् । जसले गर्दा भोजपुरी सिनेमाका निर्देशक र नेपाली सिनेमाका सफल द्धन्द्व निर्देशकको डेव्यु निर्देशकिय सिनेमा कस्तो बन्यो होला भन्ने कौतुहल्ता नेपाली दर्शकमाझ रहेको सिनेमाको केही दिन अगाडी सार्वजनिक ट्रेलरलाई मिलेको उत्काजनक प्रतिक्रिया हेर्दा नै थाहा हुन्छ ।

त्यसमाथि उनले डेव्यु सिनेमामा नै दक्षिण भारतीय सिनेमाका चर्चित कलाकार तथा बलिउडबाट सिमाटोग्राफर झिकाएर ‘ह्रस्व दीर्घ’ निर्माण गरेका छन् । यसले गर्दा पनि सिनेमा दर्शकको प्रतिक्षामा रहेको बुझ्न ग्राह्रो पर्दैन् । एउटा कमेडी, लभ, सोसियल ड्रामा र इमोसन भएको सिनेमामा हामीले नदेखेको र नसुनेको कहानीलाई एकदमै ठूलो क्यानभासमा देखाएको दाबी निर्देशक पन्तले गर्दै आएका छन् । त्यसकारण पनि यो सिनेमा चर्चाको शिखरमा छ ।

सिनेमा ‘ह्रस्व दीर्घ’मा नेपाली र दक्षिण भारतीय कलाकारहरुको पल्टन नै रहेको छ । पहिलोपटक नेपाली सिनेमामा दुई देशका कलाकारहरुबीच यस किसिमको सहकार्य भएको हो । यसले सिनेमालाई हाइप दिलाउन ठूलो भूमिका खेलेको छ । कलाकारका कारण नै सिनेमाले बक्सअफिसमा सफलता हासिल गर्न सक्ने विश्लेषण सिनेमा पण्डितहरुमाझ भइरहेको छ ।

गत बुधबार ट्रेलर सार्वजनिक भएपछि सिनेमाप्रति दर्शकमा उत्साह चुलिएको छ । ट्रेलरलाई मिलेको भ्यूज र प्रतिक्रिया हेर्दा उत्साहजनक देखिन्छ । सिनेमाको ट्रेलर सार्वजनिक भएको ५ दिनमा ट्रेलरलाई युट्युबमा २१ लाखभन्दा बढीले हेरेका छन् । यो कुनैपनि नेपाली सिनेमाको ट्रेलरलाई मिलेको भ्युज आक्रामक हो । युट्युब ट्रेन्डिङको दोस्रो स्थानमा रहेको ट्रेलरलाई यो समाचार तयार पार्दासम्म लगभग ४० हजार लाईक अनि ३ हजार ४ सय बढिले प्रतिक्रिया दिएका छन् । अधिकांश प्रतिक्रियामा दर्शकको तारिफ मात्र भेटिन्छ ।

कतिले ट्रेलरको आधारमा सिनेमा ‘सुपरहिट’ हुने उल्लेख गरेका छन् भने कतिले हिन्दी सिनेमालाई टक्कर दिएको धारणा प्रस्तुत गरेका छन् । नेपाली सिनेमाको मेकिङमा परिवर्तन आउन थालेको प्रतिक्रिया सिनेमाको ट्रेलरको कमेन्टबक्समा धेरै देखिन्छ । अभिनेत्री नीता ढुंगाना, दक्षिण भारतीय कलाकार ब्रह्मानन्दमको प्रशंसामा पनि शब्द खर्चिएका छन् । द्वन्द्व, छायांकन, संवाद, पाश्र्व संगीत पक्ष पनि रुचाइएको छ । सम्रगमा ट्रेलरले दर्शकलाई सन्तुष्ट तुल्याएको दर्शक प्रतिक्रियाबाट बुझिन्छ ।

सिनेमामा हरिहर अधिकारी, नीता ढुंगाना, ब्रह्मानन्दम, अली, कवीर दुहान सिंह, प्रदीप रावत, सुनिल वर्मा र प्रशान्त ताम्राकार, सञ्चीता लुईटेल, विपना थापा, सरोज खनाल, नरेन खड्का, गरिमा शर्मा, रवीन्द्र झा, आर्दश मिश्र, बुद्धि तामाङ र किरण केसीलगायतका कलाकारको अभिनय रहेको छ ।

अभिनेता हरिहर अधिकारीको कथा र प्रतीक पौडेल, निर्देशक पन्त र हरिहरको पटकथा तथा संवाद रहेको सिनेमालाई बलिउडका चर्चित सिनेमाटोग्राफर कवीरलालले खिचेका हुन् । सिनेमाका कार्यकारी निर्माता धनन्जय गलानी हुन् ।

नीता फिल्मस्को ब्यानरमा निर्माण भएको सिनेमाको नेपालसहित भारतमा अवस्थित संसारकै ठूलो स्टुडियो रामोजी फिल्म सिटीमा छायांकन गरिएको ‘ह्रस्व दीर्घ’को निर्माणमा ६ करोड खर्च भएको दाबी निर्माण टिमको छ । यो सिनेमा नेपाली, तेलुगु र हिंन्दी गरी तीन भाषामा रिलिज हुनेछ । विजय वस्यालले पोस्टर डिजाइन गरेको सिनेमालाई मनोज राठी र उज्वल पौडेलको व्याङ्कटेस इन्टरटेनमेन्ट वितरण गर्दैछ ।