द सिनेमा टाइम्स, काठमाडौं । आगामी फागुनको २९ गतेबाट होलीको अवसरमा प्रदर्शनमा आउने सिनेमा ‘आउटलः दफा २१९’को ओएसटी सार्वजनिक गरिएको छ । ‘अन्धो कानुन’ बोलको गीतले नेता र सरकारमाथि आक्रोश पोखेको छ । कानुन अन्धो हुँदा देशमा नारीको अस्मिता कसरी लुटिएको छ भन्ने आवाज गीतमा बोलिएको छ ।

मिस्टर डीले तयार पारेको यो गीतमा उनकै र्याप र संगीत छ । नितु पुनले पनि गीतमा स्वर दिएकी छिन् । यो गीतको भिडियोमा दिर्घ धामीको कन्सेप्ट, सम्पादन र निर्देशन छ । सलिनाको कार्यकारी निर्देशन रहेको गीतको भिडियोमा सलिना सुनार र साजेश बलामी पनि निर्देशन टिममा छन् । राजेश कुटुको गीतमा कोरियोग्राफी छ । नविन गुरुङले यो सिनेमाको गीत खिचेका हुन् ।

सार्वजनिक गीतलाई दर्शकले निकै मन पराएका छन् । सिनेमाको यो गीतले जनताको आवाज बोलेको भन्दै सिनेमाप्रति उत्साह अझै थपिएको दर्शकको प्रतिक्रिया छ । यो गीतमा एउटै व्यक्ति बारम्बार सरकारमा गएको, जनतामाथि अन्याय गरेको, बलात्कारीलाई संरक्षण गरेको लगायतका शब्द बुनिएको छ ।

सिनेमालाई विक्की महर्जनले लेखन तथा निर्देशन गरेका हुन् । सिनेमामा अमित अग्रहरी र निशा गुइडेको लगानी छ । विक्की महर्जन र दिर्घ धामीको पटकथा रहेको सिनेमामा विनोद कठायत कार्यकारी निर्माताको रुपमा छन् । सिनेमामा सुशील श्रेष्ठ, नरेश पौडेल, शिक्षा संग्रौला, सुमन भण्डारी, हेममान गुरुङ, सोनी लागुन, विशाल पहारी, महेश त्रिपाठी, आयन परियारको अभिनय छ ।

सिनेमाको ट्रेलरलाई दर्शकको उच्च साथ मिलेको छ । सिनेमाको मेकिङ, प्रस्तुति, कलाकारहरुको अभिनय र एक्सनको तारिफ भइरहेको छ । यसैले, सिनेमाले दर्शकको सुखद साथ पाउने विश्वास गरिएको छ । चुल्ठे काजीको एक्सन रहेको सिनेमामा साहिल खानको सम्पादन छ ।