द सिनेमा टाइम्स, काठमाडौं । सर्वकालीन ब्लकबस्टर सिनेमा ‘पूर्ण बहादुरको सारङ्गी’का निर्देशक सरोज पौडेलको नयाँ सिनेमा ‘कोशेढुंगा’ कस्तो बन्ला भन्ने चासो सिनेकर्मीदेखि दर्शकसम्मलाई छ । दर्शकमा रहेको अपेक्षा पूरा गर्ने ‘कोशेढुंगा’का कार्यकारी निर्माता दिनेश खड्काले बताए ।

सिनेमाको कथा र छायांकनमा भइरहेको मेहनतले दर्शक निराश नहुनेमा आफू ढुक्क रहेको निर्माता खड्काको दाबी छ । ‘अहिले जुन हिसाबले काम भइरहेको त्यो हामीले सोचेभन्दा राम्रो भइरहेको छ । आजसम्मको काम हेर्दा आउटपुट पनि राम्रो आउनेमा हामी ढुक्क छौं,’ निर्माता खड्काले भने, ‘सिनेमाको अनलाइन सम्पादनको काम सेट मै भइरहेको छ । जसमा सबै कलाकार र प्रविधिकको मेहेनत देख्दा दर्शकलाई केही खास हुनेछ भन्ने हामी सेटबाटै भन्न सक्छौं ।’

खड्काले स्याङ्जाको स्थानीय तह, वडा र पालिकाबाट पाएको सहयोगले पनि छायांकन सहज र प्रभावकारी भएको बताए । ‘पूर्ण बहादुरको सारङ्गी’ले नेपाली बक्सअफिसमा करिब ४७ करोडको व्यापार गर्दै सरोज पौडेललाई नेपाली सिने क्षेत्रमा नयाँ उचाईमा पुर्याएको छ,’ उनले भने, ‘दर्शकको माया र अपेक्षालाई बुझेर कोशेढुंगामा पनि त्यसअनुसारको मेहनत गरिरहेका छौं । हामी कुनै पनि हालतमा दर्शकलाई निराश बनाउने छैनौं ।’

निर्माण घोषणादेखि नै दर्शकमाझ उत्सुकता र अपेक्षा दुवै बढाएको यो सिनेमाको छायांकन स्याङ्जाका विभिन्न स्थानमा पछिल्लो एक महिनादेखि भइरहको छ । च्यासलस्थित सेटमा करिब एक हप्ता छायांकन गरेर बाँकी छायांकनका लागि निर्माण टिम स्याङ्जा गएको थियो । कार्यकारी निर्माता खड्काका अनुसार अबको एक सातामा सिनेमाको सम्पूर्ण छायांकन सकिनेछ । स्याङ्जाको आधिखोला, त्रिवेणी र सिरुवारी क्षेत्रमा ‘कोशेढुंगा’को करिब एक महिनादेखि छायाकंन भइरहेको छ ।

नरदेवी फिल्मस्को प्रस्तुति रहेको सिनेमामा अभिनेत्री सुरक्षा पन्त, आर्यन सिग्देल, ऋचा शर्मा, नीति शाह, प्रवीण खतिवडा, सरोज खनाल, विशाल पहाडी, लोकमणि सापकोटा, हिउवाला गौतम, सिर्जना अधिकारी, शेखर चापागाई, दिनेश काफ्ले, सिरु विष्ट, स्नेहा जोशी, सुबलमणि सापकोटा, सविता रेग्मीलगायतको अभिनय रहनेछ ।

सिनेमाको निर्मातामा प्रेविल कँडेल र किशोर अनुराग छन् । कार्यकारी निर्माता दिनेश खड्का हुन् । बाबु श्रेष्ठले छायांकन गरिरहेको यो सिनेमालाई सुरेन्द्र पौडेलले सम्पादन गर्नेछन् । सिनेमाको गीतमा रिदम कँडेल र आशिष अविरलको संगीत रहनेछ । कास्टिङ डिरेक्टर सुवलमणि सापकोटा हुन् ।

निर्माण टोलीले ‘कोशेढुंगा’लाई विसं २०८२ मा प्रदर्शन गर्ने लक्ष्य राखेको छ । यद्यपि औपचारिक रिलिज मिति भने घोषणा गरिएको छैन ।