द सिनेमा टाइम्स, काठमाडौं । मंसिर १ गते भोली हुने नेपाल चलचित्र निर्माता संघको नयाँ नेतृत्वका लागि उम्मेदवारको टुंगो लागेको छ । शनिबार निर्वाचन समितिले उम्मेदवार सूची सार्वजनिक गरेको हो । जसअनुसार केही पदाधिकारी निर्विरोध निर्वाचित भएका हुन् ।

निर्माता संघ आगामी कार्यकालको लागि निर्विरोध निर्वाचित हुनेमा कोषाध्यक्ष र कार्यसमितिका सदस्य छन् । शनिबार उम्मेदवारी दर्ताको समय सकिएपछि निर्वाचन समितिले यी पदमा कसैको दावी विरोध नपरेपछि निर्विरोध निर्वाचित भएको घोषणा गरिएको थियो । जसअनुसार कोषाध्यक्षमा रामप्रसाद रिजाल निर्विरोध निर्वाचित भएका छन् । यसअघि कार्यसमिति सदस्य रहेका रिजालले निर्माता संघलाई आर्थिक रुपमा बलियो र चुस्त बनाउने जिम्मेवारी आफ्नो काँधमा आएकाले त्यसलाई प्रमाणित गरेर देखाउने बताउँछन् ।

त्यस्तै कार्यसमिति सदस्य ९ जना रहनेमा सात जनाको मात्र उम्मेदवारी परेकाले कार्यसमितिका सवै निर्विरोध निर्वाचित भएका छन् । निर्विरोध सदस्य निर्वाचित हुनेमा स्वर्णीम कम्युनिकेशन प्रालीका श्रीधर पौडेल, फिल्म मेकर्स प्रालीका चुम्बन जंङ्ग शाही, टंक बुढाथोकी प्रोडक्सन प्रालीका टंकबहादुर बुढाथोकी, विन्ध्याबासीनी क्रिएशन प्रालीका मनोजकुमार अधिकारी, मिडिया पोर्ट प्रालीका प्रवीण कार्की, वीर गोर्खाली फिल्मस् प्रालीका घनेन्द्र थपलिया तथा रेडआई फिल्मस् प्रालीका राजकुमार पण्डित छन् ।

अध्यक्षमा सुनिलकुमार थापा र उदय सुब्बाको प्रतिस्पर्धा हुने भएको छ भने उपाध्यक्षमा दीपेन्द्र के खनाल, रौनकविक्रम कडेल र ज्योतीराज राई छन् । यी तीनमध्येबाट दुई जना उपाध्यक्ष चयन हुनेछन् ।

त्यस्तै महासचिवमा किरण नेपाली र खगेन्द्रप्रसाद लामिछानेको प्रतिस्पर्धा हुने भएको छ । त्यस्तै सचिवमा युवराज गिरी र कृष्णप्रसाद पोखरेल (किसान पोखरेल)को प्रतिस्पर्धा हुनेछ ।