द सिनेमा टाइम्स, काठमाडौं । नेपाल फिल्म क्याम्पसको आयोजनामा तथा चलचित्र विकास बोर्डको सहयोगमा ‘सिनेमा कथा-लेखन सम्बन्धी एक दिने आधारभूत कार्यशाला’ सफलतापूर्वक सम्पन्न भएको छ। यो कार्यशाला पौष १९ गते नेपाल फिल्म क्याम्पस, पिंगलास्थान, गौशालामा आयोजना गरिएको हो।

कथा लेखनमा रुचि राख्ने २५ जना प्रशिक्षार्थीहरूको सहभागिता रहेको उक्त कार्यशालामा भारतको सिनेमा एण्ड टेलिभिजन इन्स्टिच्युट अफ इन्डियाबाट पोस्ट-ग्रेजुएट पूरा गरी हाल नेपाल सिनेमा क्याम्पसमा निर्देशन तथा पटकथा लेखन विभागका प्रमुखका रूपमा कार्यरत केशव पाण्डे प्रशिक्षकको रूपमा सहभागी थिए। कार्यशालामा सिनेमा कथा-विज्ञान, कथाका आधारभूत तत्वहरू तथा लेखन प्रक्रियाबारे व्यावहारिक र सैद्धान्तिक प्रशिक्षण प्रदान गरिएको थियो।

कार्यशालाप्रति उल्लेख्य रुचि देखिएको र ठूलो संख्यामा नाम दर्ता भएकाले माघ र फागुन महिनामा दोस्रो तथा तेस्रो चरणको कार्यशाला पनि सञ्चालन गरिने आयोजकले जानकारी दिएको छ। सहभागी प्रशिक्षार्थीहरूले पेश गरेका कथाहरूमध्येबाट उत्कृष्ट १० जनाको छनोट गरी उनीहरूका लागि पटकथा लेखनसम्बन्धी विशेष कार्यशाला सञ्चालन गरिनेछ ।

कार्यशालाको समापन समारोह तथा प्रमाणपत्र वितरण कार्यक्रम दिनेश डिसीको प्रमुख आतिथ्यतामा सम्पन्न भएको थियो। सो अवसरमा अध्यक्ष डिसीले यस्ता कार्यशालाहरूले नयाँ पुस्तालाई सिर्जनात्मक रूपमा सक्षम बनाउँदै नेपाली सिनेमा क्षेत्रको दीर्घकालीन विकासमा महत्वपूर्ण योगदान पुर्‍याउने विश्वास व्यक्त गर्दै, कथा र पटकथा सशक्त भएमा नेपाली सिनेमाको स्तर अझ उचाइमा पुग्ने धारणा व्यक्त गरे।