‘प्रेमा’ यात्रामा भेटेको पात्रबाट प्रभावित छ : निर्देशक भण्डारी

‘प्रेमा’ यात्रामा भेटेको पात्रबाट प्रभावित छ : निर्देशक भण्डारी

द सिनेमा टाइम्स
0
Shares

द सिनेमा टाइम्स, काठमाडौं – निर्देशक गोविन्द सिंह भण्डारीले निर्देशकीय डेब्यू सिनेमा ‘रणवीर’बाट राम्रै चर्चा पाएका थिए । तर सिनेमाले बक्सअफिसमा भने सोचे अनुसार दर्शक तान्न सकेन् । केही दक्षिण भारतीय सिनेमामा काम गरिसकेका भण्डारीले साउथको एक्सन फ्लेभरलाई ‘रणवीर’मा प्रस्तुत गरेका थिए ।

निर्देशक गोविन्द प्रेमकथाको सिनेमा ‘प्रेमा’ लिएर आगामी चैत १७ बाट दर्शकमाझ आउँदैछन् । सिनेमामा शुभेक्क्षा खड्का, सृष्टि श्रेष्ठ र अरुण क्षेत्रीको प्रमुख भूमिकामा अभिनय छ । सिनेमाको तेलुगु, तमिल र हिन्दी भर्सन ओटीटीमा रिलिज हुँदैछ । लेखनका हिसाबले भण्डारीले ‘रणवीर’ भन्दा ‘प्रेमा’ लेखेका थिए । तर ‘रणवीर’ पहिले बन्यो र ‘प्रेमा’ दोस्रो ।

गोविन्दका अनुसार ‘प्रेमा’ वास्तविक व्यक्तिबाट प्रभावित भएर लेखिएको थियो । गोविन्दले जीवनको कुनै समयमा एक युवती भेटेका थिए, जोबाट प्रभावित भएर उनले ‘प्रेमा’ लेखे । ‘प्रेमाको वास्तविक चरित्र जुन युवतीमा पाएँ, त्यो चरित्रलाई समातेर अघि बढ्न सक्छु भन्ने लाग्यो । किनकि ऊ साधारण भएर पनि उसमा अरुलाई आफूतिर आकर्षण गर्ने क्षमता छ ।

मान्छेहरु बढी चमकधमक भएको वस्तुतिर आकर्षित हुन्छन् । तर प्रेमाको चरित्र आफैंमा शान्त सुशील हुँदा पनि उसमा आकर्षक व्यक्तित्व छ’, गोविन्द भन्छन्, ‘त्यो चरित्रलाई लिएर कथा भन्न मन थियो । मान्छेको जीवनमा केही घटना यस्ता हुन्छन्, जुन उसले कहिल्यै बिर्सन सक्दैन । प्रेमाको कथा पनि त्यस्तै घटनाबाट प्रभावित भएर लेखिएको हो ।’

गोविन्दाका अनुसार ‘प्रेमा’ संस्कृतबाट आएको शब्द भए पनि यसलाई तेलुगूमा बढी प्रयोग गरिन्छ । जसको अर्थ ‘माया’ हो । नेपाली सिनेमामा जुनसुकै गीतमा ‘माया’ शब्द जोडिए जस्तै साउथका हरेक सिनेमाका गीतमा ‘प्रेमा’ अनिवार्य जस्तै छ । गोविन्दको बुझाइमा स्क्रिप्ट लेख्दा एउटा ‘इमेज’ दिमागमा आउँछ । ‘प्रेमा’ लेखिरहँदा उनको दिमागमा पात्रको कपाल, अनुहार, उचाइ र शरीरको बनावट बनाइसकेको थियो ।

शुभेक्क्षासँग उनले ‘रणवीर’मा काम गरिसकेका थिए । त्यसकारणले शीर्ष चरित्रमा शुभेक्क्षा ‘फिट’ छिन् भन्ने कुरामा उनी ढुक्क थिए । ‘म वास्तविक पात्र र सिनेमाको पात्रसँग नजिक थिएँ । शुभेक्क्षासँग पहिला पनि काम गरिसकेको हुनाले शुभेक्क्षाले प्रेमा चरित्र निर्वाह गर्न सक्छिन् भन्नेमा म ढुक्क थिएँ’, गोविन्द भन्छन्, ‘शुभेक्क्षालाई सबै कुरा भनेर, स्क्रिप्ट पढ्न लगाएर, न्यारेसन सुनाएर ‘तिमी क्रिएटिभली स्क्रिप्ट मनपर्छ भने मात्र काम गर’ भनें ।’

गोविन्द नयाँ अनुहारसँग काम गर्न मनपराउँछन् । सिनेमाका लागि चाहिने प्रमुख पुरुष पात्रका लागि उनले धेरैजनासँग अडिसन लिएका थिए । तर उनले सोचेको जस्तो पात्र फेला पार्न सकेका थिएनन् । त्यही बेला सिनेमा सम्पादक कृष्ण भण्डारीले अरुण क्षेत्रीको नाम लिए । अरुण त्यो समयमा रेनाशा वान्तवा राईको सिनेमा ‘आइ एम २१’मा काम गरिरहेका थिए ।

कृष्णले अरुणसँग कुरा गरेर उनको तस्वीर गोविन्दलाई पठाइदिए । तस्बिर हेर्दा उनले खोजकै जस्तो पात्र अरुणमा पाए । ‘तर तस्वीरमा भन्दा वास्तविकतामा मानिस फरक हुन्छन् । मैले अरुणको अडिसन लिनुभन्दा पनि सुटिङ हेर्ने बहानामा उसको काम हेर्छु भन्ने निर्णय लिएँ । सुटिङमा गएर हेर्दा अरुणको काम, शारीरिक हाउभाउ राम्रो लाग्यो । अनि उसलाई अडिसनमा बोलाएँ’, गोविन्दले सम्झिए ।

सृष्टिसँग गोविन्दको पहिलो सहकार्य हो । तर उनले सृष्टिका सिनेमा भने हेरेका थिए । सृष्टिसँगको पहिलो सहकार्यबाटै उनी प्रभावित भएका रहेछन् । ‘सृष्टि काममा ध्यान दिने कलाकार हुन् । यो तरिकाले काम गर्ने मान्छेसँग मैले अहिलेसम्म सहकार्य गरेको थिइनँ’, गोविन्द भन्छन्, ‘सृष्टि प्रि–प्रोडक्सनअन्तर्गत वर्कसपमा नोट लिएरै बस्थिइन् । म बोलिरहँदा उनी नोट गरिरहेकी हुन्थिइन् । उसले के लेखिरहेको छ भन्ने हामीलाई थाहा पनि हुँदैन थियो । उनी समयमै सुटिङ सेटमा आउँथिइन् । कतै ढिलो हुने अवस्था भएमा खबर गर्थिइन् । उसको सिनेमा हेरिसकेको हुनाले काम गर्न गाह्रो हुँदैन भन्ने अनुभव भयो ।’