द सिनेमा टाइम्स, काठमाडौं – २२ वर्षदेखि मनभित्र ठूलो पर्दामा ‘हिरो’ हुने सन्तोष अधिकारीको सुसुप्त चाहाना, कोरोनाको लकडाउनमा राम्रैगरी बिउँझियो । मोबाइलको क्यामरा अगाडि उभिएर थुप्रै भूमिकाहरुको र अभिनयका नवरसहरुमा आफूलाई नियाले । घरी नक्कल उतारे, घरी आफैलाई जगाए। टिकटकमा थुप्रै भिडियो बनाए र ड्राफ्टमा थुपारे। उनको यो हर्कतले पत्नी र छोरा त दिक्दार नै भए। छोराको हातमा क्यामरा थमाउँदै खिच्न सहयोग माग्दा बाबुको हर्कतका कारण हैरान छोराले  मुखै फोरेर दिक्दारी पोख्यो – ओ ड्याड कम अन ।

‘चित्रा’ सिनेमाबाट नेपाली रजतपटमा डेब्यू गर्न लागेका अधिकारीले आफ्नो अभिनयको उत्कठ चाहाना ‘सिनोप्सिस’ सुनाए। त्यसो त उनी ‘आमा’, ‘घर’ लगायतका सिनेमाका निर्मातामध्येका एक हुन्। निर्माताको अनुभवपछि उनी अभिनयको परिक्षा दिन तयार भएका छन्। पुस २९ गते ‘चित्रा’ रिलिज हुँदैछ।सिनेमालाई लिएर उनी उत्साहित छन्। डबिङ्मा आफूलाई पर्दामा हेर्दा दंग परेका उनले यो सिनेमाबाट राम्रै आशा राखेका छन्। उनको यही सिनेमा र उनको डेब्यू यात्राका बारेमा कुरा गर्दा उनी यस्तो सुनिए

‘चित्रा’को मनपरेको कुरा के हो?
– कन्टेन्ट।

चित्रमा जुन तपाईंले निर्वाह गर्नु भएको पात्र छ, त्यो पात्रलाई कसरी न्याय गर्नसक्छु जस्तो लाग्यो?
– यो एउटा बाबुको भूमिका हो, जसका सन्तानहरु छन्। म आफै पनि एउटा बाबु हुनुको नाताले यसको भावना राम्ररी बुझ्छु।

पर्दाभित्र र बाहिरको बाबुमा के फरक हुन्छ नि?
– पर्दामा पनि वास्तविक जीवनका भोगाइहरुलाई नै प्रस्तुत गर्ने हो, केही संशोधनसहित । त्यसैले त्यसले बोक्ने भावनामा उतिसारो फरक छैन ।

तपाईंको परिभाषामा एउटा अभिनेता के हो ?
– आफ्नो भूमिकालाई अभिनयका माध्यमबाट न्याय गर्न गर्नसक्ने मान्छे, जसले आफ्नो चरित्रको सूक्ष्मतालाईसमेत प्रस्तुत गर्नसक्छ।

‘चित्रा’मा गरेको भूमिकामा आफूले कति न्याय गरेछु जस्तो लाग्छ?
– डबिङमा हेर्दा मैले मेरो पात्रलाई सयमा सय न्याय गरेको छु भन्ने भान भयो। म आफ्नो प्रशंसा आफै गरेर रमाउने मान्छे होइन, अरुले गर्दा मात्र आफ्नो कामले न्याय पाउँछ भन्नेमा विश्वास राख्छु। दर्शक बनेर हेर्दा म आफै दंग परें, मैले न्याय गरेछु भनेर।

यो सिनेमाबाट तपाईंलाई प्राप्त हुने कुरा के हो?
– यसले सन्तोष अधिकारी एउटा अभिनेता हो भन्ने परिचय दिन्छ जस्तो लाग्छ।

सिनेमामा निर्मातासमेत हुनुहुन्छ, त्यसैले यसको सारा जसअपजस तपाईंमाथि आउनेवाला छ, त्यसका लागि तयार हुनुहुन्छ?
– म सबै कुरा फेस गर्न तयार भएरै आएको हुँ । अब यसमा आउने भनेको युनिभर्सल कमेन्टहरु हुन्, तिनले मलाई खुशी नै दिन्छ । मान्छेले आफूले गरेको गल्ती स्वीकार गर्ने क्षमता राख्नुपर्छ। मैले त कुनै गल्ती गरेको नै छैन । यसमा म कार्यकारी निर्मातामात्र हो, निर्मातामा अरु साथीहरु हुनुहुन्छ । नाम देखिंदा म अगाडि छु, त्यस कारणले म जेजस्तो परिणाम आउँछ त्यसको सामना गर्न तयार छु।

‘चित्रा”को विषयवस्तु मनपरेको छ भनेर अघि भन्नुभयो, मनपरेको विषयवस्तु कति प्रतिशत पर्दामा रुपान्तरण भएको पाउनुभयो ?
– मैले ६०-७० प्रतिशत रुपान्तरण भएको पाएको छु। निर्देशकको कोणबाट त निर्देशकले उचित जवाफ दिनुहुनेछ यसमा । फेरि मलाई यो पनि थाहा छ कि स्क्रिप्टको ३०-४० प्रतिशत निकाल्नसक्नु भयो भने पनि त्यो फिल्म सफल हुन्छ।

कुन खाले दर्शकले यो सिनेमालाई मनपराउलान्?
– यो सबैखाले दर्शक लक्षित पारिवारिक फिल्म हो। पारिवारिक कथाबस्तु त्यसमथि बाबुछोरीको कथा भएकाले यो वर्गविशेष भन्दा सबै दर्शकको रोजाइमा पर्ने फिल्म हो । अस्ति भर्खर हामीले १० वर्ष मुनीका बालबालिकालाई निशुल्क फिल्म देखाउने कुरा सार्वजनिक गरि नै सकेको कुराबाट पनि यो फिल्म सबै दर्शकका लागि हो भन्ने त छर्लङ्ग भइसक्यो।