द सिनेमा टाइम्स, काठमाडौं – सोनी टिभीमा प्रसारण भैरहेको चर्चित रियालिटी शो इण्डियन आइडलको १४ औं संस्करणमा प्रतिस्पर्धा गरिरहेकी नेपालकी मेनुका पौडेललाई चिकित्सकले आर्टिफिसियल इन्टिलिजेन्स (एआई) जडित स्मार्ट भिजन चस्मा प्रदान गरेका छन् ।

भारतीय नेत्र चिकित्सक डाक्टर नितिन र रोहनले एआई जडित विशेष चस्मा आइतबार प्रसारण भएको इण्डियन आइडलको एपिसोडमा प्रदान गरेका हुन् । मेनुकालाई यो चस्मा लगाई दिएर डेमो प्रदर्शन रियालिटी शोको मञ्चमा समेत गरिएको थियो ।

मेनुकाले लता मंगेशकरको गीतमा पर्फम गरेपछि चस्मा उपहार दिन चिकित्सक आइडलको स्टेजमा पुगेका थिए । ती डाक्टरले मेनुकालाई ‘गिफ्ट अफ साइट’ भन्दै चस्मा प्रदान गरेका थिए । यो चस्मा लगाएपछि मेनुकाले रियाज गर्न सक्ने, एक्लै हिँडडुल गर्न सक्ने, पढ्न सक्ने र सामुन्ने उभिएको मान्छेलाई चिन्न सक्ने सो अवसरमा बताएका थिए ।

चस्मा लगाइसकेपछि मेनुकाले चिकित्सक र इण्डियन आइडललाई धन्यवाद दिइन् । उनले भनिन् – हजुर दुई जनाले मेरा जीवनमा सबैभन्दा ठूलो उपहार दिनुभएको छ । यस्तो काम इण्डियन आइडलको मंचमा मात्र हुनसक्छ । अन्य धेरै व्यक्ति पनि हुनुहुन्छ, जसलाई म मद्दत गर्न सकुँ ।’

डाक्टरले सबै जज र अतिथिलाई मञ्चमा बोलाएर चस्माको डेमो प्रस्तुत गरेका थिए । सो चस्मा लगाएकी मेनुका अघि उभिएका जज कुमार सानुलाई एआई जडित चस्माले अंग्रेजी भाषामा ‘कुमार सानु अघि उभिएका छन्’ भनेर आवाज दिएको थियो ।

उक्त चस्मामा क्यामेरा जडान गरिएको छ । क्यामेराले फोटो खिच्ने र सेन्सरले उक्त इमेजबारे विस्तृत बताउँछ । चस्माको सेन्सरमा एआई जडान गरिएको छ । चस्माको साइडमा पाँच अक्षर पनि समावेश छन् । जसलाई थिचेर मेनुकाले काम पनि गर्न सक्छिन् ।

मेनुकाले इण्डियन आइडलको जारी सिजनमा उत्कृष्ट १० भित्र प्रतिस्पर्धा गरिरहेकी छिन् ।