द सिनेमा टाइम्स,काठमाडौं – कलाकार तथा निर्माता रवीन्द्र सिंह बानियाँले नेपाली सिनेमाको बजार निर्दयी रहेको बताएका छन् । बजारअनुसार नचले सिनेमा नै बनाउन नसकिने उनको भनाइ छ ।

आफूहरू सर्जकमात्रै नभएर व्यापारी पनि भएको उनी बताउँछन् । अर्को सिनेमा बनाउन अहिले बनाइरहेको सिनेमाबाट पैसा कमाउनु पर्नेभएकाले आफूहरू व्यापारी पनि भएको उनको भनाइ छ । त्यसैले दर्शकलाई केन्द्रमा राखेर सिनेमा बनाइरहेको उनले बताएका छन् ।

निर्दयी बजारले बिक्ने चिज बनाउनुपर्छ भनेर दबाब दिने गरेको उनको अनुभव छ । त्यसैले बजार र कला दुवैको वरिपरि रहेर काम गरिरहेको उनले बताए । लामो समय टिक्ने र बिक्ने सिनेमा बनाइरहेको भन्दै  आउँदा दिनमा पनि यही फर्मुलाअनुसार सिनेमा बनाउने रवीन्द्रको भनाइ छ ।

पछिल्लो समय चौथो सिक्वेल बनाउने तयारी गर्दा तेस्रो सिनेमा बिगार्ने गरिएको उनको गुनासो छ । तर आफूहरूले कहिले पनि आउँदो सिक्वेलको तयारी सुरुमै नगर्ने गरेको दाबी गरे । अर्को सिक्वेल बनाउनुपर्छ भन्ने प्रेसरमा हामी कहिल्यै पनि परेनौँ । जात्रा बनाउँदा पनि जात्रैजात्रा सोचेका थिएनौँ ।

जात्रैजात्रा बनाउँदा महाजात्रा सोचेका छैनौँ,” रवीन्द्र अगाडि थप्छन्, “यसको अर्थ अब हामी सिक्वेल नै बनाउँदैनौँ भन्ने कमिटमेन्ट गर्दैनौँ । कुनै समय सिक्वेल नै बनाउन पनि सकिएला । त्यो भोलिको कुरा भयो ।स्ट्याब्लिस भइसकेका कलाकारलाई लिएर सिनेमा बनाउँन पनि सकिन्छ । त्यो भोलिको कुरा हो ।”तर अहिले ‘जात्रा’ टिमको योजनामा सिक्वेल नरहेको उनको भनाई छ ।

‘एउटै बक्सभित्र बसेर काम गर्दा चरित्र खोजेर नयाँ संसार क्रिएट गर्न सकिँदैन । एउटै बक्सभित्र बसेर यो सम्भव छैन भन्ने हामीलाई थाहा छ,’ उनले भने, ‘त्यसैले अब अरु नयाँ काम गर्ने सोचमा छौँ । यति म अहिले नै भन्न सक्छु, अब महाजात्रा बन्दैन ।’ 

‘महाजात्रा’मा सकेसम्म सानासाना गल्ती तथा कमिकमजोरी पनि हटाउने प्रयास गरिएको उनको भनाइ छ । उनले हरिवंश आचार्य लाई यो सिनेमाले हास्य कलाकार मात्रै भएको ट्याग हटाइदिने उनको दाबी छ । ‘जिन्दगीभर हसाएर उहाँले रुवाएर नेसनल अवार्ड जित्नुभयो,’ यो पटक बेष्ट खलनायकको अवार्ड पाउनुहुन्छ,’ उनले भने, ‘नेसनल अवार्डमा यो विधा छैन जस्तो लाग्यो । अरु अवार्डमा उहाँले पाउनुहुन्छ। हुन त अवार्डका आ आफ्नै विधिविधान छन् । उहाँले पाउनु होला नहोला हामीले भने दिइसक्यौँ ।’ हरिवंशलाई हास्य कलाकार मात्रै भन्दा अन्याय हुने उनको भनाइ छ ।

हरिवंश आचार्य, विपीन कार्की, वर्षा राउत, रवीन्द्र सिँह बानियाँ रवीन्द्र झा, दिब्य देवलगायत कलाकार मुख्य भूमिकामा रहेको सिनेमालाई प्रदीप भट्टराईले निर्देशन गरेका छन् । निर्देशक स्वयंको लेखन रहेको सिनेमा यही चैत ९ गते रिलिज हुँदैछ । म्याक्स दीपेशखत्री र यज्ञश्वर पौडेले निर्माता रहेको चलचित्रको कार्यकारी निर्माता रवीन्द्र सिँह बानियाँ हुन् ।