द सिनेमा टाइम्स,काठमाडौं । अधिकांश सिनेमा मेकरले भन्दै आएको एउटै कुरामा सहमत हुने हो भने सिनेमा भनेको इन्टरटेनमेन्ट (मनोरञ्जन) नै हो । सिनेमाको पहिलो धर्म इन्टरटेन्मेन्ट हो । सूचना, सन्देश, चेतना लगायत विषय वा मुद्दा तपसिलका कुरा हुन् । अथवा मनोरञ्जनसँगै यस बाहेकका अन्य कुरा आए सुनमा सुगन्ध, होइन मनोरञ्जन मात्रै छ भने पनि ठिकै छ । त्यो सिनेमालाई दर्शकले मन पराउनु पर्यो । हलमा गएर हेरिदिनु पर्यो । त्यही नै राम्रो सिनेमा हो ।

यस्तै सिनेमा मध्यको एक हो, ‘महाजात्रा’ । जुन सिनेमा हेर्न अहिले देशभरका सिनेमा घरमा दर्शकको ‘महाजात्रा’ नै लागिरहेको छ ।

सुरुमा लागौँ सिनेमा ‘महाजात्रा’को कथातर्फ । सामान्य व्यक्तिलाई आकस्मिक रूपमा करोडौँ रुपैयाँ पैसा व्यवस्थापन गर भनेर कसैले परिबन्धमा पार्यो भने उसको हालत के हुन्छ ? एकारित आर्थिक अभाव, अर्कोतिर पारिवारिक दवाब । एकातिर सामाजिक प्रतिष्ठा अर्कोतर्फ ज्यान नै धरापमा परिरहेको अवस्था ।

यही कथाको वरिपरि सिनेमा र सिनेमा पात्रहरू डुल्छन् । यही कथाको वरिपरि घरिसिनेमा पात्रमा खुसीको दियो बल्छ, घरि निरासाको दियो निभ्न खोज्छ ।

जीवन उज्ज्यालिने आशामा जागिर गर्न पुगेका सिनेमा मुख्य तीन पात्र फणिन्द्र, जोयश र मुन्ना अर्थात् क्रमशः विपीन कार्की, रवीन्द्र सिंह बानियाँ र रवीन्द्र झा त्यतिबेला तरबारको धारमा उभिएको महसुस गर्छन् जब उनीहरुलाई जागिर र रिसर्च (अनुसन्धान)का नाममा दुई नम्बरी धन्दा गर्ने कसैले फसाएको छ ।

कलो धन कसको हो उनीहरूलाई थाहा हुँदैन । तर लुकाइदिनुपर्ने दाबाब उनीहरूलाई हुन्छ । यही कथा भन्छन्, निर्देशक  तथा लेखक प्रदीप भट्टराई ‘जात्रा’को तेस्रो श्रृंखला ‘महाजात्रामा’ ।

पहिलो हाफमा सिनेमाले अमुक व्यक्ति र ठाउँबाट पैसा लुकाउन दिने दबाब र त्यसको चपेटामा परेका मुख्य पात्रको कथा भन्छ । दर्शकलाई हसाउँछ । फुल कमेडीले भरपुर मनोरञ्जन दिन्छ । समय बितेको पत्तै हुँदैन ।

सिनेमाको दोस्रो हाफमा पैसाको रहस्य खुल्दै जान्छ । लेखक तथा निर्देशकले गोदाममै राख्ने पैसा कसको हो ? खुलाउँदै जान्छन् । रहस्य खुल्दै जाँदाबल्ल दर्शकले थाहा पाउँछन् ।

अहिलेको नेपाली समाज र राजनीतिको कथा निर्देशकले भन्न थाल्छन् । पैसाको बलमा राजनीति गर्ने, चुनाव जित्ने, मन्त्री हुँदै प्रधानमन्त्री बन्ने नेपाली राजनीतिको वास्तविक कथा भन्छन् ।

कालो धन थुपारेर त्यसलाई लुकाउने नेता सधैँ आफू अनुकूल वातावरण बनाउन सक्षम हुन्छन् ? निर्दोष नागरिक सधैँ नेताको जालझेलमा परिरहन्छन् अथवा उन्मिुक्ति पाउँछन् ? यही नै सिनेमाले भन्ने कथा हो ।

पहिलो हाफले मनोरञ्जन दिन्छ भने दोस्रो हाफले समसामयिक राजनीतिक वेथितिको चित्रण गर्दै व्यंग्यसहितको मनोरञ्जन प्रदान गर्छ ।

विपीन कार्की, रवीन्द्र सिंह बानियाँ, रवीन्द्र झा, वर्षा राउत ‘जात्रा’ सिरिजका कलाकार हुन् । उनीहरूको अभिनय अब्बल छ ।

यो पटक सिरिजमा जोडिएका हरिवंश आचार्य, दिव्य देब पनि सिनेमाका नयाँ आकर्षण हुन् । उनीहरूको अभिनय अब्बल छ।दर्शकको ध्यान खिच्छ ।

नेपालमा मात्रै होइन छिमेकी बलिउड होस् वा परको हलिउड अहिले माहोल सिक्वेलको छ । सिक्वेल बनाउने होडबाजी नै छ । तर धेरै जसो सिनेमाका सिक्वेल दशर्कले मन पराएको पाइँदैन । कारण जति सिक्वेल तन्किँदै जान्छ । ती त्यति नै कमजोर पनि हुँदै जान्छन् । तर प्रदीप भट्टराईले भने ‘जात्रा’को ब्रान्डलाई बचाइरहेका छन् । त्यसैले उनले दर्शकको माया पाइरहेका छन् । प्राविधिक पक्षमा उनले समय दिएको भए सायद उनको यो सिरिज परिस्कृत समेत हुनेथियो ।

सिनेमामा मनोरञ्जनसँगै केही सन्देश पनि हुनुपर्छ भन्ने मान्यताको जगमा बसेर उनले सिनेमाको कथा भन्दै गएका छन् । समाजको जल्दोबल्दो कथामार्फत् समाजलाई व्यंग्य गर्दे पेट मिचिमिचि हसाउँन सक्नु उनको विशेषता हो, जुन उनले यो सिनेमामा गरेका छन् ।

‘महाजात्रा’ रिलिजभन्दा अगाडिको एक पत्रकार सम्मेलनमा हरिवंश आचार्यले भनेका थिए । ‘माहाजात्रा’का हरेक सिनमा क्लाइमेक्स छ । जुन सिनेमामा हुनुपर्छ । जुन सिनेमाको हरेक सिनेमा क्लाइमेक्स हुन्छ, त्यो सिनेमा हिट हुन्छ । दर्शकले मन पराउनु हुन्छ । उनले उक्तभनाइ सिनेमाले प्रमाणित गरिदिएको छ । सिनेमामा क्लाइमेक्स मात्रै होइन, पञ्चलाइन पनि छ ।

तर अनावश्यक ठाउँमा असान्दर्भिक पञ्चलाइन होइन, ठिक्क समयमा ट्वाक्क आउने कमेडी नै ‘महाजात्रा’को विशेषता हो । यही नैदर्शक हास्नुको कारण हो । दर्शकले सिनेमा मन पराउनुको कारण हो ।

सबैलाई सबै सिनेमा मनपर्छ भन्ने छैन । व्यक्ति अनुसारको रुचि फरक फरक हुन्छ । जुन आफैँमा स्वभाविक पनि हो । तर पछिल्लो समय नेपाली दर्शकको को रुचि भने प्रायः कमेडी सिनेमामा देखिने गरेको छ । अहिले कमेडी र डार्क कमेडी जनराका सिनेमामा दर्शककोआकर्षण देखिन्छ । जुन ‘जात्रा’ सिरिज, ‘कबड्डी’ र ‘छक्का पञ्जा’ सिरिजको कमाइले पुष्टि गर्छ ।

केमडी सिनेमा मन पर्छ भने ‘महाजात्रा’ तपाईंले हेर्ने सिनेमा हो । कथा भन्दै हसाउने यो सिनेमा कमेडी मन पराउने दर्शकले हलमा गएरहेर्ने सिनेमा हो । सिनेमा अवधिभर सबै कुरा बिर्सिएर रमाइलो प्रदान गर्ने सिनेमा हो, ‘महाजात्रा’ ।

चोटिलो कथा भन्दै दर्शकलाई मजाले हसाउन सक्नु ‘महजात्रा’को सबल पक्ष हो । निर्देशक प्रदीप भट्टराईको खुवी हो । जात्रा’ सिरिज मन पराउने दर्शकलाई  ‘महाजात्रा’ ले निराश बनाउँदैन ।

० ० ०

निर्देशक/लेखक – प्रदीप भट्टराई

कार्यकारी निर्माता – रवीन्द्रसिंह बानियाँ

निर्माता – दीपेश खत्री (म्याक्स)/यज्ञश्वर पौडेल

कलाकारहरू – विपीन कार्की, हरिवंश आचार्य, रवीन्द्रसिंह बानियाँ, रवीन्द्र झा, वर्षा राउत, राजाराम पौडेल, दिव्यदेव आदि

जनरा – कमेडी

लम्बाई – दुई घण्टा ४० मिनेट

ब्यानर – षट्कोण आर्टस ।