द सिनेमा टाइम्स, काठमाडौं । गायिका अस्मिता अधिकारी र गायक महेश काफ्लेको संयुक्त सांगीतिक कार्यक्रम ‘सोलफुल युएसए यात्रा’ घोषणा भएको छ । यो सांगीतिक टुर सन् २०२५ को अगस्टदेखि अक्टोबरसम्म अमेरिकाका २० भन्दा बढी विभिन्न सहरहरूमा आयोजना हुनेछ । मंगलबार राजधानीमा आयोजित एक पत्रकार भेटघाटमा उक्त जानकारी दिइएको हो ।

ओनेस्ट रियल इस्टेट प्रस्तुत र थ्री ई इन्टरटेन्मेन्टको व्यवस्थापन गरिएको यो सांगीतिक यात्रा कोलम्बस, ओहायो, मियामी, फ्लोरिडा, ब्रानफोर्ड, कनेक्टिकट, एशबर्न, भर्जिनिया, ल्यान्कास्टर, पेन्सिलभेनिया लगायतका २० भन्दा बढी अमेरिकी सहरसम्म पुग्नेछ । महेश र अस्मिताको अमेरिकाको विभिन्न सहरमा राम्रो डिमान्ड भएकाले पनि यो सांगीतिक यात्राको आयोजना गरिएको थ्री ई इन्टरटेन्मेन्टका नेपाल प्रतिनिधि अन्जान बुढाथोकीले जानकारी गराए ।

यता महेश र अस्मिताले पनि आफुहरु यो सांगीतिक टुरको लागी निकै नै उत्साहित रहेको बताए । अमेरिकामा रहेका नेपाली समुदायहरु माझ नजिक पुगेर गीत सुनाउने मौका रहेको भन्दै खुसी व्यक्त गरे । उनीहरुका ‘लजावती झार’, ‘नाच फिरिरि’ र ‘लाइटरले बिडी सल्केको’ जस्ता गीतहरू हिट छन्।

थ्री ई इन्टरटेन्मेन्टले धेरै ठुला कन्सर्ट, टुर र सांस्कृतिक कार्यक्रमहरू सफलतापूर्वक आयोजना गर्दै आएको छ । थ्री ईले यसअघि आनी छोइङ डोल्मा, अभया एण्ड द स्टिम इन्जिन्स, काली प्रसाद बाँस्कोटा, इन्दिरा जोशी, प्रमोद खरेल र अञ्जु पन्त जस्ता चर्चित नेपाली कलाकारको अमेरिका टुर गराई सकेको छ। साथै, १९७४ एडीको लाइभ कन्सर्टसहित थुप्रै अन्तर्राष्ट्रिय स्तरका कार्यक्रमहरू पनि आयोजना गरेको छ।

थ्री ईले सन् २०२२ देखि भर्जिनियामा ‘डिटिफेस्ट – दसैँ तिहार फेस्ट’ नामक बृहत् सांस्कृतिक कार्यक्रम सञ्चालन गर्दै आएको छ। यस्तै, सन् २०१२, २०१३ र २०१७ मा ‘ग्लोबल नेपाल फेस्ट’ आयोजना गरेर नेपाली संस्कृति, पर्यटन र व्यापारलाई अमेरिकामा चिनाउने ऐतिहासिक पहल गरिएको थियो।