द सिनेमा टाइम्स, काठमाडौं । आगामी बैशाख ११ गतेबाट प्रदर्शनमा आउने सिनेमा ‘परालको आगो’को टिजर सार्वजनिक गरिएको छ । श्रीमान्-श्रीमती (चामे र गौँथली)को झगडालाई केन्द्रमा राखिएको टिजरमा अभिनेता प्रकाश सपुत रिसाहा श्रीमानको भूमिकामा देखिएका छन् । उनकी श्रीमतीको भूमिकामा अभिनेत्री सुहाना थापा छिन् । टिजरमा सौगात मल्ललाई पनि देख्न सकिन्छ ।

हरिओम सिने मेकर्सको ब्यानरमा निर्माण भएको सिनेमामा सौगात, प्रकाश र सुहानासहित सिर्जना अधिकारी, किशोर भण्डारी, ज्याक श्रेष्ठ, सरिता भण्डारी, रेणु न्यौपाने, मन्जिला बानियाँ लगायतका कलाकारहरूले अभिनय गरेका छन् । लक्ष्मण सुनारको निर्देशन तथा सुशील पोखरेलको लगानी रहेको सिनेमामा सुशील देवकोटाको पटकथा तथा संवाद लेखन छ ।

ग्रामीण लोककथाका प्रणेता मानिने गुरुप्रसाद मैनालीको चर्चित कथा ‘परालको आगो’बाट प्रेरित भएर यो सिनेमा निर्माण भएको हो । सिनेमामा संकल्प भुजेलको छायांकन, मिलन श्रेष्ठको सम्पादन, रामजी लामिछानेको नृत्य निर्देशन, कनाल कँवरको रंग संयोजन तथा शान्ती ठटाल, सत्य-स्वरुप र प्रकाश सपूतको संगीत रहेको छ ।