द सिनेमा टाइम्स, काठमाडौं – नेपाल चलचित्र कलाकार संघको आगामी चैत ४ गते हुने निर्वाचनमा अध्यक्ष पदमा उम्मेदवारी दर्ता गराएकी अभिनेत्री रेजिना उप्रेतीले आफ्नो प्यानल घोषणा गरेकी छन् । बुधबार काठमाडौंमा पत्रकार सम्मेलन गर्दै उनले एजेन्डा सार्वजनिक र प्यानल घोषणा गरेकी हुन् ।

रेजिनाको प्यानलमा शिवहरी नेपाल बैरागी र सरिता गिरी उपाध्यक्ष र पनाह अधिकारी महासचिवका उम्मेदवार छन् । त्यस्तै, सचिवमा जीवन थापा र कोषाध्यक्षमा विनोद कुमार भट्टराई छन् भने उनको प्यानलको सदस्यहरुमा खुश्बु खड्का, खिन्न भण्डारी, लक्ष्मण चौलागाई, इश्वर बल्लभ उप्रेती, दिल बहादुर दोङ, रामकुमार कार्की, राजेश गोसाई, नितु कोइराला, दिनेश अवाल, निर्मल स्याङ्तान र भिमसेन बजगाई छन् ।

आफ्नो प्यानलको घोषणा गर्दै रेजिनाले आफ्नो टिमले संघमा राम्रो काम गर्ने दाबी गरिन् । संघको दुई कार्यकाल उपाध्यक्ष भैसकेकी उनले आफ्नो चुनावी एजेन्डामा ७० वर्ष नाघेका जेष्ठ कलाकारलाई मासिक पेन्सन भत्ता प्रदान गर्न पहल गर्ने, स्वास्थ्य उपचार योजना, कल्याणकारी कोष वृद्धि योजना, शाखा विस्तारलगायतका विषय समावेश गरेकी छन् । काम गर्न सकिने कुराहरुलाई मात्र एजेन्डामा राखेकाले आफुले ती एजेन्डाहरु पूरा गर्ने प्रतिवद्धता जनाइन् ।

उनले भनेकी छन्, ‘यसपटक कलाकार संघमा मभन्दा पनि हामीको रुपमा अघि बढेका छौं । हामी सबै एक भएर संघमा उत्कृष्ट काम गर्ने अठोटका साथ म अध्यक्षमा उठेकी छु । नेपाली सिनेमामा उत्कृष्ट काम गरिसक्नु भएका अग्रज तथा साथीहरुलाई मैले आफ्नो टिममा पाएको छु । हाम्रो टिमले प्रस्तुत गरेका सबै प्रतिबद्धता संघमा आएपछि पूर्ण रुपमा लागू गर्ने प्रण पनि गर्दछु ।’

रेजिनालाई अध्यक्षमा श्वेता खड्कादेखि पूजा शर्मासम्मले सामाजिक सञ्जालमार्फत समर्थन जनाएका छन् । रेजिनाको प्यानल घोषणा तथा प्रतिवद्धता पत्र सार्वजनिक कार्यक्रममा मदनदास श्रेष्ठ, नरेश पौडेल, राजेन्द्र खड्गी, रमेश उप्रेती, नारायण पुरी, शाभित बस्नेत, पल्पसा डंगोल लगायतका कलाकारहरु उपस्थित थिए ।

कलाकार संघको अध्यक्ष पदमा रेजिनाको प्रतिस्पर्धा बरिष्ठ कलाकार मोहन निरौलासँग हुँदैछ । उनले पनि भोलि ककाठमाडौंमा एक कार्यक्रम गर्दै आफ्नो प्रतिवद्धता र टिम सार्वजनिक गर्दैछन् ।