द सिनेमा टाइम्स, काठमाडौं – गत शुक्रबार अर्थात् बैशाख १ गतेबाट प्रदर्शनरत आएको सिनेमा ‘जारी’ पाइरेसीको मारमा परेको छ । सामाजिक सञ्जालबाट सिनेमा पाइरेसी भइरहेको भन्दै निर्माताले प्रहरी उजुरी दिएका हुन् । सिनेमाले दुई दिनमा आक्रामक व्यापार गर्दै ४ करोड २० लाखबढि कलेक्सन गरिसकेको छ । आज पनि हलमा दर्हकको चाप उस्तै छ ।

आइतबार पाइरेसीमा संलग्न फेसबुक, टिकटक, युट्युब र इन्स्टाग्रामका ३२ वटा एकाउन्टविरुद्ध निर्माता मणिराम पोखरेलले प्रहरी साइबर ब्युरोमा उजुरी दिएका हुन् । हलमा खिचेर ती एकाउन्टबाट सिनेमाका दृश्य हाल्दा निर्मातालाई आर्थिक नोक्सान भएकाले पाइरेसीमा संलग्नको अनुसन्धान गरी क्षतिपूर्ति दिलाइदिन समेत निर्माता पोखरेलले माग गरेका छन् ।

उपेन्द्र सुब्बा निर्देशित जारीका दृश्यहरु अहिले सामाजिक सञ्जालमा छ्याप्छ्याप्ती हालिएको छ । दयाहाङ राई, मिरुना मगर र विजय बरालको मुख्य भुमिका रहेको सिनेमाले अहिले बक्सअफिसमा आक्रामक कमाइ गरिरहेको छ । सिनेमाका लामा-लामा दृश्य पनि टिकटकमा हालिएको छ ।

पछिल्लो समय सामाजिक सञ्जालबाट हुने सिनेमा पाइरेसी निर्मातालाई हैरानीको विषय बनिरहेको छ । सामाजिक सञ्जाल मार्फत भैरहेको पाइरेसीले निर्मातालाई ठूलो आर्थिक क्षति पनि पुगेको छ ।