द सिनेमा टाइम्स, काठमाडौं – गत बर्षको चैत २४ गतेबाट प्रदर्शनमा आएको सिनेमा ‘बहाव’ले घोषणा गरेको थाइल्यान्ड भ्रमण अफर बुटवलमाकी विद्या न्यौपानेले जितेकी छन् । शुक्रबार सिनेमाकी मुख्य अभिनेत्री सुरक्षा पन्तले गोला प्रथाबाट विजेता छनोट गरेकी हुन् । विजेता न्यौपानेले भ्रमणका लागि दुईतर्फी हवाई भाडा र तीनतारे होटलमा बसाईसहित चार रात, पाँच दिनको प्याकेज प्राप्त गरेकी छन् ।

पुरस्कार जित्नका लागि ‘बहाव’को टिकट खल्ती एपमार्फत काट्नुपर्ने सर्त राखिएको थियो । विजेतालाई थाइल्यान्ड टूरको जिम्मा एमडी होलिडेजले लिएको छ । विजेताले विजेता घोषणा भएको दुई हप्ताभित्रमा एमडी होलिडेज ट्राभल वा खल्ती एपको सपोर्ट डेस्कमा सम्पर्क गर्नुपर्ने जनाइएको छ । विजेता घोषणा भएको मितिदेखि तीन महिनासम्मलाई मात्र यो टूर प्याकेज मान्य रहनेछ ।

विजेताले विशेष परिस्थितिमा यात्रा गर्न असमर्थ भए उसले आफ्ना परिवारका सदस्यहरूलाई नाता प्रमाणित हुने कागजपत्र देखाएर प्याकेजको लागि मनोनित गर्न सक्नेछन् । भिसा प्रोसेसिङको लागत प्याकेज विजेता स्वयंले व्यहोर्नु पर्नेछ । त्यस्तै, सिनेमाको टिमले अप्सरा जैसीलाई ‘कफी डेट’को विजेता घोषणा गरेको छ । उनले सुरक्षा पन्तसँग भेट गरेर कफी खाने अवसर प्राप्त गरेकी छन् ।

प्रमोद कँडेलको लेखन तथा निर्देशन र श्रीधर पौडेलको लगानीमा निर्माण भएको सिनेमामा कमलमणि नेपाल, अफरान अली, इश्वरी सिंह, हीरालाल कँडेल, सुर्य शर्मा भट्ट, पवन श्रेष्ठको पनि अभिनय छ । सिनेमामा कार्तिकेय स्मिता कर्नाटकको छायाङ्कन, सुजन बडालको सम्पादन र वसन्त सापकोटा, सुशान्त गौतम र रिकेश गुरुङको संगीत रहेको छ ।